萬豚屋@尖沙咀

萬豚屋
尖沙咀赫德道19-23號地舖，35986282
推介 : 石燒醬油豬手手打烏冬 (食唔到就可以走得 !)

-------------------第四次---------------
第四次去呢間串到爆既烏冬，但次次去既目的，都唔係去食鳥冬，而係去食佢地既豬手，次次都係限量得十隻左右，真係慢少少都比人搶哂，所以一入去，我就叫左豬手烏冬先，點知係剩番2 隻 =0=

--------------------第二次---------------
2009/06/06
經過上一次同朋友去探完路，知道有咩係應該食同有咩係唔應該點之後，今次帶另一位朋友黎食。咦，唔使排隊啵 ! 就入左去食呢個出名烏冬既餐廳。

其實，呢間鋪可以點既食物真係少得可憐 ! 佢既小食，完全冇特別之處，所以點同唔點唔會影響大局既。呢間既然係叫萬豚屋，除左豬既配搭，真係唔好諗食其他丫，另外，上次食左個黑豚肉都係一般(今次搵唔到黑豚肉)，所以都可以唔叫。咁攪法，應該只係得 2 -3 個可以試下。唉呀，豬手沽清丫，臉色一沉，有 d 想走人既感覺....

最後為有食佢個韓式石頭鍋厚切豚肉烏冬啦 (鬼咁死長....)


食完呢餐，真係有 d 脂肪既感覺，相信近呢一兩年都唔會再試了。

豬手的蘆山真面目。

嘩......完全估唔到咁淋....可能煲左真係有幾個鐘...
一切落去，好似切緊棉花糖咁。佢煲左咁耐，其實食落有 d 似阿媽煲完湯 d 豬肉咁，但味道又濃 d 既，其實真係幾得，所以如果食唔到呢個，應該可以掉轉頭走。



韓式石鍋厚切豚肉烏冬

呢個絕對係一個脂肪套餐。因為佢既豚肉，脂肪同肉既比例係 3: 1，食左一舊都怕怕地，更何況有幾舊，仲要舊舊比例都唔一樣，出左名姐，可唔可以留番少少水準丫。

不過，烏冬真係好 ok 的，煙煙韌韌，又可以keep到個溫度，加埋個豬骨湯底，基本上個鳥冬係上級的。

不過，呢間餐廳就連豚肉都麻麻地，點會叫萬豚屋嫁，不如索性叫烏冬算啦 。


是日消費 : 約 100/位

莊園@銅鑼灣

莊園韓國料理
銅鑼灣謝斐道500號1-2樓，28363877
尖沙咀金巴利街1號G舖，23684606

首先，我想講一樣野就係．．唔好叫我食家，食神之類既名喇，因為我自問我又唔識食，淨係識得彈，又冇建設性。食神係應該識煮野食嫁麻，我又乜都唔識。所以我只不過係一個普通既食客姐。第二樣野，想證明一下，鐘意食野同有小肚腩唔係成正比的，大家唔好誤會。第三樣野，我份人對食比較主觀，如果覺得說話唔岩聽的話，就無謂駁喇，當八掛新聞睇完笑一笑就算喇。

今次去呢間其實真係冇咩期望，只不過係唔想我個ｆｂ咁多西餐，日式咁。所以我就搵左一間韓國餐廳，想加少少其他原素入黎，先會多姿多采丫麻。其實講到韓國野，一定唔及堪富利士道個間出名同正宗，但今次為左係銅鑼灣食，就唯有下次先去啦。

揀呢間第二個原因係價錢都幾公道，唔算太貴。另外，佢碟碟野都勁大碟，兩個人食都有少少吃力．．．

由於食韓燒食得多，所以今餐我特登唔叫燒物ｏｒ火煱，真係想試下佢地ｄ小菜，睇下同平時有咩唔同。

另一方面，環境幾好，坐得幾舒服，服務都幾好，又有笑容，服務都加唔少分。


我叫左三樣野，就黎左九碟前菜，佢拎過黎個時，我遠遠已經望到，心諗，唔係咁多麻．．．點知，真係送埋黎，個下真係有少少呆左，雖然之前都有食過，但第一次見咁多．．

其實全部名我都係自己憑感覺搬上去，真正個名真係唔知，有錯請指正。

薯仔，甜甜地，一夾就散，好粉既薯仔。
泡菜，好辣，我開始覺得自己食唔到辣。
茄汁豆腐，豆腐加茄汁，凍版，講完
薯蓉餅，有少少菜係入面，切粒加薯蓉炸咁。全檯唯一熱的。

In this photo: 薯仔 沙津 薯蓉餅 泡菜 芽菜 魚仔 韓國粉絲 茄汁豆腐 西洋菜


韓式炒年糕。

恕小弟愚昧，呢個根本就係年糕加魚腐加辛辣麵既味粉入去一齊炒，食第一啖勁似食緊麵咁，但明明又係年糕，好攪笑丫個感覺，可能太多同太大碟，我覺得一般姐。

ｐ．ｓ．好大碟　．．．．

蛋包魚。

魚加蛋漿拎去炸吧，一定。
呢個係幾好食既一個既，尤其加個汁，鹹鹹地又幾ｏｋ既，不過可能食唔慣，樣樣野都係咁重味既．．．．


海鮮石頭鍋飯

咦，石頭鍋呢？我係佢拎黎個時，我已經想影相，點知佢一放低就攪埋一齊，之後就分兩人份，攪到我相都影唔到一張。

呢個都幾好食既，我幾鐘意食飯焦，呢個海鮮都幾滿足到我，又新鮮，又彈牙ｄ蝦。

是日消費 : 約150/位