定食＠尖沙咀

定食
尖沙咀金馬倫道10號宏威中心地庫 ，23668072

由十一月尾至到十二月中，我冇一日係返過屋企食飯，因為要應付一個考試。而且，我都冇食過一餐係好既。有一次，我係個飯堂食飯，食食下，我想喊。點解？因為我一個人食緊一堆似係監倉拎出黎既垃圾飯咁。個下子，真係好掛住我媽咪，原來佢煮野都算係幾好食嫁喇。從個日開始，我冇踏入個個飯堂。

經過一排既磨練，我發覺我自己比之前更狼死，唔好食既野，我會當住面同人講唔好食，反之，就當然會讚啦。遲下，我一定會再打過黑名單，列出二十大一定死都唔去既餐廳。叫我去既話，我會比返錢你叫你走．．．．

廢話講完，今次去呢一間，係食魚生飯的，至於中文名就係叫定食。食咩魚生呢？就應該係藍鰭吞拿魚了。佢地既服務態度都可以，由於都十點幾先入去，食完都十一點了，佢地都冇催我地走，幾好丫。


玉子燒。

垃圾！出面凍入面暖既，係唔係放係度冇人叫，我叫就拎比我咁丫！又韌又老蛋！



漁夫風藍鰭吞拿魚飯定食

唔知多左個漁夫2個字就係等如上面個 d 魷魚鬆，係既話，唔要可唔可以減番我十蚊丫，haha！
因為我覺得加左個ｄ野係多餘咁丫。算啦，我食一啖魚生先，勁淡，唔知點形容，好似接近冇味咁，只係得少少甜味。之後落少少魚生豉油啦，勁鹹！好似頭抽咁鹹！一係就食到豉油味，一係就冇咩味，早知就唔落豉油啦，我應該會仲ｂｕｙ佢。呢個只係合格，因為我唔覺得咁值。


雜錦魚生飯

賣相麻麻地，我只係覺得佢ｄ〔飯〕係ｏｋ嫁姐，因為有好多種汁撈埋整個飯咁。但佢上面ｄ魚生好似人地賣唔哂個ｄ咁支解左整上去，見到都唔係咁想食，不過佢既味道係ｏｋ既，配合都可以既，係賣相差ｄ姐


紅荳大判燒

呢個我反而覺得係ｏｋ既，外層有少少脆，內裡就比較軟同熱既，不過就內外都乾身左少少，如果冇整咁耐會更加好ｄ。

是日消費：約150/位

韓國錦城飯店

韓國錦城飯店
尖沙咀堪富利士道5號地下，23118636
推介 : 牛尾煲

今次特登同平哥食慶生飯，由於係廿六號，事前已經好多地方都ｂｏｏｋ到ｆｕｌｌ哂，所以我今次特登搵ｄ唔使ｂｏｏｋ位既地方去ｔｒｙ下。最後剩番兩個ｃｈｏｉｃｅ，一係頂太瘋，一係就呢間了。

次次都諗唔到食咩既時候，我就會直接問一問個負責人，有咩好食嫁？佢一定通常例牌話樣樣都好食，咁我就會直接問有咩係最多人叫既！！！咁佢一定推出幾樣多人揀既野，等我去揀，既然大家都冇意見，咁就好快點到野嫁喇。

一行三人叫左４碟野，最後竟然飽到剩番一碟．．．早知就點少一樣啦！

平哥生日快樂啵，希望下年冇咁忙可以同你早少少慶祝啦。





8 碟免費前菜，正宗韓式餐廳必定會出現既前菜。一個人食既話，只係食前菜都半飽了，韓式仲要係好大碟咁上，真係想飽死人咩，好！就同你死過！


蛋包魚

先來一個蛋包魚，估唔到韓式的餐廳跟貼了香港餐廳出餐既速度，真係幾快就到啵。個蛋包魚其實係冇咩味，要點一點右手面既醬汁，先會特別出來。個汁有少少辣，有香茅，有少少酸，再加豉油，個醬汁都幾得，點左之後就唔同哂，由本來好似食普通的煎魚＋蛋，變左一碟幾特別既一道菜。


韓式石頭牛肉煱飯

本人由細細過好食得辣，到而家只係食到小辣既我，入到黎韓式，都有一半係用辣了，我都怕怕地。就連呢個，佢上之前就問我地落唔落哂ｄ辣佢，我當然唔想啦，容乜易唔使食嫁。個待應會一黎個時就〔撈起〕佢，我反而鐘意完完整整咁食。我見到佢個石煱入面都算足料既，普普通通，不過不失啦，基本上石煱就係咁。


牛尾煲

呢個真係要一讚！個老闆娘叫我地一定要點既，就係其中就係呢一個，我覺得呢一個好正，因為牛尾好好好淋，又入哂ｄ蘿白味，蘿白又有牛尾味，就連個湯都飲得，可想而知煲呢個用左幾多個鐘，我諗最少都５小時，先做到咁既效果，所以呢個菜真係幾正同幾抵！


蔥油餅

三個人食，呢碟野未免太多了嘛．．．一共有十二件，我食左五件左右，佢地兩個人係咁話飽，我仲要５點食左個米線先過黎，你地２位既功力未免太遜了嗎．．．
呢碟野係我地ｅｎｊｏｙ緊個牛尾個時就殺出來，確實係ｏｋ既，好似嘉頓既一隻由細食到大既蔥餅一樣味道，不過係淋淋地既版本，係好夠味，但好似重味左少少姐，不過唔緊要，３個人根本冇可能食得哂。





是日消費：約180/位

火山石@旺角

火山石：
旺角通菜街2A-2P號鴻光大廈地下C舖，2332 6891
主打推介：燒豬手石煱烏冬 ，辣湯海鮮烏冬 ，煙三文魚鍋巴壽司

哎呀，廿五號正日，我竟然冇野做丫，哈哈，之後就同ｆｄ去左行ｍｋ，行行下個ｆｄ就問我：你上次唔係話有一間必食嫁咩？之後就同佢由街尾行到街頭，再行番街尾咁搵。嘩，通菜街真係勁難搵囉。之後就係街尾見到我想食個間了。其實你話呢間係唔係好好食，我又唔太覺囉，不過如果話抵唔抵食，我又覺得幾抵，咁先拎出黎推介一下。店內外都不裝

呢間野，ｄ野飲好難飲同唔抵，我下次一定唔飲野丫，十幾蚊比ｄ咁既貨式，真係節省少少啦。

係通菜街食野，通常都係食ｄ平野，同埋一ｄ有特色既野，我諗呢度係其中一間了。




燒豬手石煱烏冬

佢地既豬手今次真係要推介一下，因為真係好好好淋，仲好入味，外層就有少少香草味，不過就肥左少少。顧住身子，都係食少ｄ肥膏好ｄ，佢個燒汁都幾得，唔會太鹹，配埋個烏冬真係幾正！


黑芝麻黑豚肉烏冬

我都叫左個ｆｄ唔好叫嫁喇，佢又話想試新野，咁就幫佢叫左囉。我一食就覺得有少少硬同好乾，食左一舊就放低左了，黑芝麻不是首選！


蛋包海鮮卷

其實我覺得呢個冇咩特別嫁咋，蛋加入沙津醬整咁，好似人地小丸子ｄ蛋漿咁姐。食唔到咩海鮮囉，蝦都冇一隻咁鬼慳皮既！只係食到少少墨魚粒加蟹柳仔。

燒鯖魚

呢個要讚一讚佢先，因為佢全條都起哂骨，２舊都啖啖肉啵，一條骨仔都冇，咁考功夫，唔比個合格你都唔得啦，呢個讚！


煙三文魚鍋巴壽司

呢個比個特別創意分先！因為我都未試過鍋巴整成既壽司，佢加左沙津醬同埋吞拿魚，食個時好似食緊麵包搽果醬咁，不過個味道都幾ｏｋ，食個時仲好麻煩添，雖然隻蝦死死地，不過整體我都比合格既，可以叫既。


牛肉豬骨湯烏冬

都唔係用溫泉蛋既，先來一個失望。平平無奇既牛肉烏冬。烏冬加肥牛姐，冇咩特別吸引。


辣湯海鮮烏冬

呢個烏冬的確係幾多蜆既，ｄ湯仲幾正，呢個基本上係最冇得彈既一個，幾十蚊呢個算交足功課嫁喇，果然係呢間餐廳既主打！




前：青檸梳打
後：招牌奶茶

頂佢丫，兩杯都呃人錢既！

是日消費：約１００／位

小店＠九龍城

小店:
九龍城侯王道11-13號地舖,　2383 1228

一直以來，九龍城比我既感覺都係食東南亞既野，去左呢個九龍城主場，大大話話都十幾次，一直都唔發覺有西餐既存在，難得今次上網見到九龍城有一間西餐聽講係幾掂，個心太軟仲係好一流添，既然咁講，一定要去呢度〔搵食〕啦！揀呢間仲有三個原因既，一來本人唔想周圍迫，二來又想試下特別ｄ既野食，三來聖誕節難ｂｏｏｋ位，呢度前幾日ｂｏｏｋ都冇問題，幾好丫。所以我既平安夜就係我最鐘意既九龍城過左了。

呢間餐廳既格局都幾得意，外表好似一ｄ酒吧咁，都完全唔似係食野既，就連個名都怪怪地，叫小店～
後來到左先知，其實佢有兩間，一間係對面個間，主攻西式甜品，相信佢地所講好正既心太軟係呢度掛。
另外我食呢間係只係食西餐姐，當日只包當日甜品，想食其他既，就要另外叫了。

由於因為燈光太暗，好難影到好靚既相，所以要各位將就一下了。


煙三文魚配火雞

火雞我其實真係覺得好唔掂，係根本佢地既肉就係好〔鞋〕。我食唔慣就覺得又乾又難食。好彩火雞係一年先出黎一次姐，唔係既話都唔知點算。
煙三文魚都可以丫，又冇根，脂肪比例都合格。


巴馬火腿配火雞。

巴馬火腿當然要配哈密瓜啦，因為火腿太鹹，要搵ｄ清新少少既生果配合返，咁先恰到好處。火腿我真係想叫佢ｅｎｃｏｒｅ添，鹹鹹地幾惹味啵。


栗子西米忌廉湯

一聽個名，我就心諗：栗子點做湯丫，好想叫佢唔好拎黎，因為本人十分討厭食栗子，會完全不留情面話唔食。個湯一黎到，我就皺眉頭，賣相咁差，不如唔好飲喇。最終我都先飲一口試下，唔好飲都係一啖姐。點知飲左一啖之後，咦？完全冇栗子味，得個顏色，之後就成碗都飲哂，仲幾好味添，雖然賣相唔令，但味道都不錯，有西米既咬感，也有少少的栗子香，不錯！

西冷牛扒

本人其實想食一ｄ特別少少既，但奈何今晚平安夜只得４個主菜可供選擇，咁少選擇，又未食過呢間餐廳，我唯有穩穩陣陣食ｄ整左都唔會難食得去邊既主菜啦。叫呢個都算係幾安全嫁喇。
牛扒，七成熟，有血，亦唔韌，有牛既咬感，應該都係幾新鮮既，佢塊牛扒都幾厚啵，食左我大半個鐘，哈哈！

燒乳鴿配意大利燴飯

哎呀，我覺得呢個乳鴿仲好食過我塊牛扒，佢燒得又幾香，又唔係全熟哂，有少少肉汁，外皮又脆脆地，內裡又香又淋，配個椰汁燴飯，真係幾ｍａｔｃｈ啵。

藍莓豆腐布甸
藍莓士多啤梨慕思

兩個都只屬一般，冇太大驚喜，唯一一樣就係有餅仔，呢個係幾特別既。
食完呢餐，都飽到要行幾個圈．．．

是日消費：260/人

糖百府 @ 佐敦

糖百府
旺角廣華街2-20號翠園大廈2期地下5號舖，22648212
佐敦吳松街139號地下，21997430
銅鑼灣渣甸街38號地下，26300110
推介 : 牛奶秋香

--------------------------第五次探訪 -----------------------
2009/12/21
食埋今次，我暫時應該唔會再去食呢間了，一來對我黎講已經冇新意喇，二來覺得呢間除左棉花冰已經冇可取之處了，我自己本人都去左５次了，係有影４次相姐，你話我瘋狂，我又唔覺，我只係想知有咩好食姐，希望帶到新意比大家，亦比我自己個肚。點知，一次又一次咁失望。冰？有幾貴姐，賣到三十幾蚊，佢真係應該賺到笑，加多ｄ新意，雪糕丫，布甸丫，咁都冇，叫我點會再理你丫。

最後總結，入去一定要食牛奶冰＞綠茶＞朱古力，其他就等ｄ人去食啦，食黎都哂時間，如果食完牛奶，覺得唔好食既話，就唔使再黎幫襯嫁喇。


--------------------------第四次探訪 -----------------------
2009/12/06
十二月到了，我d fd 入面竟然仲有人同我講未食過糖百府，唔係麻....咁鬼out 嫁，哈哈，跟我食多ｄ野啦～！

今次就帶左個黎試一試，因為之前食過左好多味，就同佢講都係點返佢個ｄ，自己點，好危險！
今次我就食左個綠茶，因為剩番呢個未食過咋！

感覺上，呢間店開始少人左啵．．．

--------------------------第二次探訪 -----------------------
2009/09/01
今次見銅鑼灣開左一間新店，去試下其他特別既棉花冰先

--------------------------第一次探訪 -----------------------
2009/08/22
呢間糖百府其實佢一開左舖我已經開始注意到佢既存在，我一直都未試，原因一係因為呢間甜品太出名，太多人排隊。第二個原因係我想試多幾間既棉花冰先試呢間，就唔會有個先入為主既感覺，覺得呢間係最好食咁。

今次試到呢間都係撞彩，話說同昇哥行街，尖沙咀，佢問我有咩好食，我好串咁答：冇喇，要食既都食左，未試既今日都摺埋(todai)，跟住就好冇ｍｏｏｄ，行過去佐敦搵下有冇新舖啦，點知之前食左兩次間泰式小舖轉左糖百府，我就同佢講，今晚一定要試下喇，橫掂咁少人．．．

終於試左佢最出名既棉花冰，感覺上我只比佢合格，棉花冰可以合格既暫時就只得佢一間，但仲有地方可以改善，例如加個雪糕，或ｄ漿可以唔好咁甜，多ｄ裝飾會好好多囉。

因為你合格，ｆｂ才會你的相，努力！



雪花冰自選組合

牛奶 + 芒果醬 + 朱古力樹皮 + 蜜瓜 + 椰果 + 小丸子

佢既牛奶冰真係幾牛奶的，咁講係因為似用牛奶黎整冰，仲要係高濃度，食少少已經ｆｅｅｌ到係牛奶，並唔係牛奶加水／汁囉。因為之前食個ｄ有好多係用汁加冰再刨，唔係難食既，但食到分到出黎囉。

底層係佢所有配料，咁擺我又覺得麻麻地，放隔離我先見到嫁麻！

直度影~

朱古力秋香。
朱古力冰 + 香蕉 + 椰果 + 棉花糖 + 朱古力漿 + 朱古力樹皮

呢個既顏色對比冇我個咁明顯，但係佢既朱古力都幾正，香蕉麻麻地，會〔啞〕色的！層次幾分明，都應該唔會差過我個個。





第二次探訪

胚芽好立克 + 朱古力漿 + 粟米片 + 奇異果 + 焦糖布丁粒 + 棉花糖

如果有得比較，我就覺得呢個組合真係麻麻地 =.= 好多好立克既感覺，但可能又勁甜同勁酸既交替，好難入口...如果單獨咁食，我相信幾好味。

第二次探訪

生磨花生 + 咖啡焦糖漿 + 朱古力樹皮 + 芒果 + 朱古力魔豆 + 蒟蒻Q

好大陣花生味....可能因為我食左牛奶，唔想點相同既野，就點左呢個，點知就中左招。(lok 小提示 : 如果唔識點野食，最好就點左上角個樣，因為難食極都有限 ! )

其實呢個配搭係我唔識攪姐，朱古力真係唔可以 搭 芒果，冇計，有幾樣我都食過 =.=

第三次探訪

宇治金時：綠茶冰 + 綠茶漿 + 紅豆 + 小丸子 + 椰果 + 茶凍

之前試過兩次自已配搭，最後都係麻麻地，覺得自己揀多數都係唔好食既，所以今次我親自揀佢地比個ｄ款，希望好食啦。一黎到，我又係咁狂影食物的遺照啦！綠茶澀澀地既．．．佢加多少少糖水打冰會好ｄ囉，反正甜品就係甜嫁啦，呢個其實冇我第一次食既牛奶咁好食囉，仲要好快溶左，都幾唔開心嫁　＝０＝

第三次探訪

咖啡秋香：咖啡冰 + 焦糖 + 彩針 + 紅豆 + 小丸子 + 咖啡凍

建議：好鐘意飲咖啡既人先好揀呢一款，因為食一啖都仲ｏｋ，食哂成個好似飲左３杯咖啡咁，我就麻麻地喇，我怕訓唔著就食左少少就算，比朋友繼續努力喇，咖啡濃且苦，加左焦糖都係咁，真係唔明有乜好食，講完。

第三次探訪

朱古力秋香：朱古力冰 + 朱古力漿 + 朱古力樹皮 + 香蕉 + 椰果 + 棉花糖

呢個實在太甜，唉，點解唔可以冇咁甜嫁，食左兩啖，我已經又唔想再食，再食有糖尿丫小心！！！！

第三次探訪

全家福　ａ＿ａ”

綠茶＞朱古力＞　＞　＞　＞ 咖啡

第四次探訪

玩玩下之後，又回復返牛奶冰既時代，我個人感覺，牛奶冰暫時係最好，要食都係食第一個就算吧啦，唔好攪咁多野喇，唔係既話，盞自己對呢個印象差，唔想幫親落去。


第四次探訪

綠茶 + o者喱 + 椰果

講過了，不重覆了。

是日消費 : 30/位

大門橫町＠尖沙咀

大門橫町:
尖沙咀厚福街10號地下，2394 4335
太子通菜街151號A地下，2394 4330

推介：蟹王烏冬

經食家１號兼同事apple 姐推介呢度好好食，之後同同事阿 ted 試左一次之後，過左幾日之後偷偷地去試左佢個主打蟹王烏冬，我深信，食唔到一間餐廳既主打菜，即係未食到佢既真功夫，我點都唔會心死的....

我入去之前又發揮我既吹水本性，係咁同個待應吹水，仲比佢話認得我咁，我只不過係前幾日黎過之麻，咁都比你認到，唔通我好特別咩。之後我就同佢預訂左個蟹王烏冬，冇呢個我一定唔食嫁！！！

呢度既服務都幾ok既，不過ｄ位就可能會迫ｄ，坐得好唔舒服囉。張檯又豆腐潤咁細，叫多幾樣野，都危危乎。
整體來講，烏冬只係一般，湯就夠濃。




煙肉芝士串
呢個擁有強烈既芝士，食到一半芝士會識得自己流出黎，食一串應該唔夠我食，可惜貴左ｄ丫，唔係一定叫多幾串．．．用呢個價錢黎講係唔抵的．．（呢串野１８蚊丫．．．）

燒鯖魚

上次丫，個女店員同我講，如果我叫呢個就同我起埋骨嫁，點解今次我食，又有骨既？我諗呢個真係一個特別既優待喇。講返條魚先，雖然燒耐左少少，冇左個脆中帶淋既肉質，呢個其實可以唔點都得。

牛肉豬骨湯烏冬

奉勸各位食呢個之前，先將所有牛肉拎哂出黎先。因為個湯太熱，一陣就會將所有既牛肉都熟哂喇，之後就會好韌！豬骨湯幾濃，但配牛肉個感覺就怪怪的，佢應該可以推出更多豬既其他部分，我相信更ｍａｔｃｈ！

蟹王烏冬。

因為呢個我食既，印象特別深刻。首先，賣相都幾靚既，有堆似魚翅既物體，見到我都覺得幾令既。不過，奇怪在蟹冇咩味咁，唔夠以前食開個ｄ咁鮮甜。呢樣我又唔會扣咁多分既，因為，始終人地係賣緊幾十蚊一碗，有隻似樣ｄ既蟹，我都覺得好抵嫁喇。加上佢個海鮮湯中規中矩，我食完都幾滿足了。

是日消費:110/人