阿拉丁咖哩屋＠銅鑼灣

阿拉丁咖哩屋
銅鑼灣羅素街60號富興大廈2樓，28080250
推介 : 蕃茄牛油咖哩雞

唔知由幾時開始，個個同我出街既朋友，第一句已經唔係問我工作點丫，忙緊咩丫咁了。而佢地既第一句係問：今日帶我去食咩丫？好彩我次次都有準備姐，唔係點招呼你地班友仔。但今次個間試菜地點真係幾難搵，又冇街名，又冇大廈名．．兜極都搵唔到，熱到我死死下。

一入到去就好大陣咖哩味同炒野味。間餐廳真係幾舊下，似八十年代ｄ茶樓咁，又風扇，又鐵窗咁，幾得意丫。

拎起個餐牌，咦，都幾平啵，係銅鑼灣有咁既價錢真係算抵了，仲抵過食個飯堂。

可能因為唔係太多人，得２個人叫唔到多野食，如果唔係，應該可以試下其他野，橫掂都咁平。佢ｄ食物又唔算好好食，但又唔太差囉，平平地可以一試。

咖哩角

佢個醬有少少青咖哩味，酸酸地咁，點左都幾開胃的。咖喱角入面個ｄ應該就係我唔太鐘意既薯蓉了，但都ｏｋ的，又脆又熱。

蕃茄牛油咖哩雞。

用蕃茄加紅咖哩煮，我又食唔到有牛油啵，哈哈，只係食到蕃茄同少少辣，應該都係紅咖哩了。

鐵板羊肉卷。

牛肉卷有少羶味既，用左檸檬都整唔甩，雖然真係唔知佢點整，個羶味攪到怪怪地咁，肉又唔結實，好似肉餅卷埋左咁。

芒果乳酸　ｖｓ　青檸梳打

芒果乳酸勝！
似沙冰 + 益力多 + 芒果

是日消費 : 65/位

Saizeriya Italian Restaurant @ 荃灣

Saizeriya Italian Restaurant
荃灣青山公路388號中國染廠大廈中染新城商場1摟103舖，31020220
將軍澳培成路8號南豐廣場1樓R1B號舖，21773130

呢間日式意大利餐廳係呢幾個月一直都係某飲食論壇排名排得非常之高，短短兩三個月就可以殺入十大，總店加分店都可以同時上榜，咁我當然要會一會佢啦！第一次去坑口個間，去到原來係寫名仔而並非派飛仔既，本來帶哂相機諗住同你賣廣告，點知，我ｍｉｓｓ左３張檯，已經叫到第四張，佢都唔比我補飛，真係豈有此理，我即閃人唔食！

到今次去到荃灣，用左一個冇咩人用既方法拎位，就係逢五進一，即係拎哂所有５，１０，１５，２０既飛，之後就乖乖坐係度第個ｆｄ‧‧‧你地班友仔，要我等３個鐘！
真係豈有此理！

入番正題先，呢間係自助形式，拎野飲係自己沖，任沖的，唔飲就蝕嫁喇。但我反而覺得冇咩野飲，同埋好少ｒｅｆｉｌｌ，所以保險都係汽水算數。

食物方面，如果唔睇個價錢，我覺得只係好一般。但係睇埋個價錢，就覺得係抵既，平平地食番餐都好既。

冷氣好凍，冇服務可言，待應叫極都唔黎，真係要我衝埋去叫佢黎先得。


薩莉亞～

牛肉漢堡比薩。

９”ｐｉｚｚａ，冇咩芝士，其實總括黎講，只係得少少粒粒牛肉加個麵包咁，算係入到下口咁囉．．．．

尼哥狄索比亞墨魚汁。

呢個真係好乾，有點似食緊墨魚膠加意粉咁，太乾身了，雖然有少少炒既味，但食落係怪怪的．．


阿拉比提吞拿魚辣汁意大利粉。

最滿意都應該算係呢一個了。雖然真係有少少辣辣地，但係加埋ｄ吞拿魚又真係幾過癮，又唔會太乾身，有又少少辣汁，加少少蕃茄，酸酸地幾好味。

海鮮意大利飯。

意大利飯都算係合格既，呢個有蠔仔，墨魚，青口，（ｄ海鮮都係麻麻地，得個樣）


邦哥尼香蒜蜆肉意大利粉。

都唔明，個個意粉都攪到咁鬼乾。其實佢係唔係整低左一大盤之後就落料炒兩炒就算嫁咋，冇味既呢個，肥佬冇情講，廢事哂口水！

煙肉菠蘿比薩。

呢個ｐｉｚｚａ比牛肉好食ｄｄ，因為都比我見到有少少誠意既，影相都冇咁ｄｒｙ丫。佢呢隻ｐｉｚｚａ　唔加調味料係唔好食的！

是日消費 : 約 50/位

Ruby Tuesday @ 太古

Ruby Tuesday
太古太古城道18號太古城中心5樓505號舖，29071133
銅鑼灣告士打道280號世貿中心10樓1002室，28951628
沙田沙田正街18號新城市廣場一期5樓507號舖，26992838
九龍灣偉業街33號德福廣場P26號舖，23763122
推介 : HUGE COLOSAL BURGER (不切開的刀仔漢堡)

去食呢間野之前，上網見到有主菜買一送一既優惠，就咁就拎住去食啦。其實本來我係想去食第二間上海小籠包，仲想介紹一下，等我個 album 唔好咁 dry丫麻，全部一係日本野，一係就西餐，冇咩特別~ 點知最高領導人一句就話：我唔鐘意食小籠包，一句就打爛左個燈泡。

其實呢間都唔係第一次入去，但係次次都唔記得拎相機，今次係有相睇既一次。入到去，依然都係幾親切，同個服務態度非常之好，幾樣都解釋得好仔細，仲同埋我地影相添，哈哈！

今餐雖然好食，但真係份量非常之多，我諗就算唔用呢一個優惠，一個主菜都應該可以兩個人食～第一次係食唔哂ｄ主菜，剩一半～其實我好細食，ｈａｈａ

露比星期二　a_a"

西蘭花芝士忌廉湯。

好ｃｒｅａｍｙ．．．
不過有人點錯野，明知食焗芝士都要飲芝士．．．ｈａｈａ，仲唔溜死丫 =0=

蜆肉忌廉湯。

哈，完全感覺唔到有蜆，唔知有冇黎錯左呢？哈哈

自助沙津吧。

好彩叫左一個咋，唔記得左呢度ｄ野好ｈｅａｖｙ，叫多一個都唔知點死丫，加上沙津吧冇野野揀，冇理由加ｄ意粉落去掛，我已經算係拎得少喇，見到人地拎到成個山咁，使唔使咁丫 =.=　拎得到唔代表食得到姐。

HUGE COLOSAL BURGER

我點之前問左一個好攪笑既問題，呢個係唔係你地餐廳最大既一個ｂｕｒｇｅｒ？衰就衰在我叫左佢分一半，唔係既話，應該會見到刀仔插漢堡，ｈａｈａ。佢分開左上我唔係幾開心添．．．呢個夠肉汁，加埋溶哂既芝士，真係推介丫，不過真係太多喇，我食左２／３就已經好飽，頂住哂個胃，薯條都冇咩點食．．．

焗烤牛肉闊條麵

點之前，我已經同個話事人講呢個係超級滯嫁喇，食到一半我已經可以頒個獎比佢嫁喇，點知佢真係點‧．．．上面個ｄ係芝士，我覺得佢真係喪落芝士，好似唔使錢咁。不過我覺得如果佢走左上面既芝士，我一定會加好多分，因為食到最後好似椽皮膠咁，硬哂，仲要好似好大塊皮咁，個場面都幾惡心．．．不過個闊條麵係ｏｋ既，係有水準既。

是日消費 : 約190/位

Mimosa Patisserie @ 天后

Mimosa Patisserie
天后電氣道22至52號金殿大廈商場內36Ｎ號舖，28060782
推介 : 芒果拿破崙

餓左成個星期５/９-１１/９，冇啖好食，好彩星期三無啦啦搵到一間ｄａｄａｌｃｅ雪糕先止到下咳，如果唔係既話，我相信今個星期五我仲會發癲。

星期五特登搵個藉口比我去買個ｃａｋｅ返黎，就係ｓａｍ生日了，估唔到９１１都咁多人生日．．．不過呢個都係為左掩飾我為食姐，咩人生日都冇所謂啦，太肚餓了！

我要串一串個賣野個阿嬸，佢都幾惡同幾串嫁啵！哼！同埋間野都幾難搵～

一個小小既ｃａｋｅ就可以完結左呢個惡夢既一個星期，心情最最差的一個星期，我覺得真係幾滿足！

芒果酥皮拿破崙　＆　士多啤梨酥皮拿破崙

三層酥皮 + 吉士 + 芒果，真係好鬼正！好脆好鬆化～加埋至愛既吉士，一食就脆到三層分開左，迫住要一啖一層！又脆又軟，芒果小酸加吉士甜，真係幾特別。我幾時比左蛋糕俘虜左嫁～我明明只不過係鐘意食甜品咋啵！

要知道幾正，真係要試過先會知～

Chocolate Truffle。

ｐａｎｔｒｙ偷食記。

好野梗係留返比自己食啦！講笑姐，呢個其實係送既ｘＤ～　
呢個Chocolate Truffle實在太朱古力喇，一共有四層朱古力，中間用蛋糕分隔，食落好強烈既朱古力漿，好似飲緊咁，攪到好滯，ＨＡＨＡ！

對比之下，都係拿破崙啦！

是日消費 : 26/件

甜甜地 @ 灣仔

甜甜地
灣仔灣仔譚臣道29號地下，23826588
推介 : 芒果糯米滋

~~~~~~ 芒果革命 ~~~~~~~~~

今次去灣仔食芒果甜品當晚飯咁食 !
去到門口都有少少怕嫁 ~ 因為冇人 !
不過時間尚早，就入左去膽粗粗咁試，其實次次都係咁嫁啦！

既然目標係芒果，咁一定要全餐都係芒果嫁啦！好，一點就點左三樣芒果甜品，仲左影右影，好鬼似飲食記者，哈哈！

佢間鋪都幾特別，幾懷舊，仲用緊個ｄ吊扇，好懷諗細細過個時．．另一方面，價錢其實都ｏｋ，不過如果由甜品既角度，都中上價錢，不過好食就冇計嫁喇～

佢既芒果甜品真係做得出色，好強調好鐘意佢個芒果糯米滋，真係好特別！

Ｐ．Ｓ．
TO: 某些人：我真係好鬼想串死你，去人地甜品屋話人地個豬扒飯唔好食，係唔係傻嫁你，生果都有時令食嫁啦，更何況餐廳呢？話人地ｄ豬扒唔好食個ｄ，唔該反省下啦！仲要扮哂食家咁！

芒果糯米滋

呢個糯米滋真係同其他唔同，佢加左奶黃入去，加埋唔酸既芒果，真係食左一碟都唔多夠！如果真係要搵一個缺點既話，就係皮有少少厚。

木桶芒果豆腐花。

其實我唔太明木桶有咩用，又唔係用個木桶黎整，個木桶只不過係裝飾。見到個膠邊就知入面可以拆開，咁就收人４０蚊，好似有點掛羊頭賣狗肉之嫌。只不過係上面芒果加下面係豆腐花，方法冇咩特別，不過其實都見到佢地既功夫，就係冇咩酸既芒果，加埋ｄ豆腐花，確實係幾消暑既。

芒果班戟。

我反而覺得呢個係最冇特別，印象冇咁深刻，只不過係皮加ｃｒｅａｍ + 芒果，好平常既一樣。同埋好難唔好食，最安全既一樣 =.=

芒果班戟。

是日消費 : 50/位