糖仁街@尖沙咀 《垃圾雪花冰》

糖仁街
尖沙咀厚福街11號地下，2368 4118

是日去完食我推介的麵屋一平安之後，竟然有２個ｆｄ話仲好肚餓，我下左一下，乜真係大食成咁既！我食左半個拉麵都飽到上心口，佢地仲話好似冇食過野咁，乜真係咁輕量咩？，咁我就提議我做東請食糖水啦，因為我好似唔好意思咁丫麻，黎到呢條街，一係就入去食甜蜜蜜，一係就係食呢間糖仁街，兩間都多人排隊，我就搵左三隻白老鼠試新野啦！

話事話，呢間主打係雪花冰，想食其他就請過主吧！當雪花冰已經成為每一間甜品既主打既時候，我對佢既好奇同衝動已經減少左好多了。不過，今日竟然比我搵到一間雪花冰，係被評為難食級！！！！！


芒果椰汁雪花冰（$41)

我都未食過芒果雪花冰，就即管點個黎試下丫，原本想點一個穩陣派既牛奶冰，諗諗下一場黎到冇理由食個咁普通掛，就點左呢個。真係黎個時都幾興奮，一影完相食左一啖，就一百八十度轉變，完全冇芒果味既！！！！大佬，你比ｄ芒果味既色素漿我都比你過丫，真係一ｄ味都冇嫁，個ｐａｔ黃色野，盡量想像佢係芒果都唔得丫！好似ｄo者喱味咁咋，仲要收我四十蚊！我即刻叫條友黎問下佢ｄ芒果味係邊！佢竟然唔理我，仲同我講呢個係芒果椰汁冰，我豈有此理丫！
個人都開始火火地，真係爭d粗口都出埋。得！你呢間垃圾可以收檔！


珍珠奶茶雪花冰

唔評丫，垃圾糖漿冰！


食物評分：★☆☆☆☆☆☆☆☆☆ (1星係因為我可以影到張相丫!)
是日消費：$40/位

大自然＠銅鑼灣《齋食齋》

大自然素食
銅鑼灣軒尼詩道502號黃金廣場8樓，2808 1386

今次去呢度既其中一個原因就唔係因為今日係初一，十五，要食齋，其實就係因為我覺得個blog 好似真係食黎食去都係個ｄ冇咩特別既野，揀呢間係想要一ｄ突破，介紹餐廳都可以多元化發展。我想講，呢間真係食齋嫁，但齋口唔齋心丫，好多都有用肉既名，咁攪笑既，不過，另一方面又覺得整呢ｄ菜好獨到，好似！唔講真係以為自己食緊肉添，哈哈！

三文魚壽司

呢個真係８成似，影相有９成似添，唔講以為係一ｄ唔新鮮既魚生添。個壽司神似，形似，但可惜係好薄呢個魚生，飯又唔係咁好食，仲要１５蚊，真正魚生仲平啵！

沙嗲羊肉串

其實都唔知點解叫羊肉串，叫豬肉，牛肉都得啦，根本就食緊麵粉，不過加左沙嗲汁，又真係幾好食啵，雖然唔係肉，但係幾好味，又唔會太乾既。

瑤柱雞絲翅

哈哈，估唔到去食齋，竟然有翅食，ｄ翅真係同我地去酒樓食既一樣，都係咁上下樣，又幾得意啵！　

蟹皇芙蓉燴翅

呢個係由蛋白加素翅加南瓜蓉整既，都幾似丫，ｄ蛋白炒得幾滑，估唔到咁整，又幾得啵，幾樣材料夾埋真係幾好食同幾似。

蠔皇麒麟鮑腩

相比之下，呢個就比較遜色一ｄ，鮑魚菇加蘿蔔加南瓜，切得幾令丫又，同酒樓個ｄ冇咩分別，我諗貴就係貴係ｄ手工度喇，我反而覺得呢個麻麻地，其實可以唔點，冇咁有衝動食呢個。

福建炒飯

我食到中段，覺得唔係咁飽，就加左個飯，哈，個飯又幾得既，不過就太多喇，由本來半飽變勁飽丫！我真係唔係幾知佢用咩炒啵，中間ｄ〔肉〕幾似扎肉既味，真係唔知咩黎，總括黎講，呢個都唔錯既。

食物評分：★★★★★★☆☆☆☆
是日消費：$135/位 (2位用)

彩雲南@銅鑼灣 《真正的過橋米線》

彩雲南
銅鑼灣信德街18號華英大廈地下，2881 8992
推介：雲南過橋米線 ，菌類

今日又係星期三銅鑼灣搜食記，今次黎到呢一間係食滇菜的！滇菜姐係咩？應該係雲南囉。黎到呢度，我都嚇左一嚇，因為呢度好靜，無論店外內都係。入到去，只係見到兩個中國人同個店員傾計，店員仲要係個廚房入面。等左一陣，終於有人理下我地，可以坐係度。個感覺好唔自然丫，因為好靜，除左２位中國人把聲，就係得ｄ冷氣聲。個餐牌一張圖都冇，都唔知咩黎。所以我又出個招喇，問下個店員有乜好食，冇圖睇真係幾唔方便，
希望佢改變下啦！

不過，呢度既菇類都幾正的，黎到一定要試下牛肝菌，起碼出面好少食到咁正的。


彩雲南秘笈！


幾優雅的茶壺


雲腿牛肝菌
呢度既菌類做得幾好，雖然比較油左少少，但可以接受，菇類同雲腿兩種味基本上一食就分到，砍種味雖然唔係好夾，但可以補足左菌類冇咩味既現像，少鹽少油的話，我諗會好味ｄ！


川爆口水雞

哈！隻雞一ｄ味都冇，只係得個醬有，所以！呢一味菜可以唔點喇！雞鞋烚烚，唔好味既！！！


滇南雲耳氣鍋雞

同樣又係雞，但我好鐘意呢一個，最起碼我飲完都仲熱嫁個鍋，你都唔好話唔野少丫！個湯好香，吸哂雞既精華，好甜既雞肉加紅棗，呢個係咁多款最好食個樣！


雲南過橋米線

正宗的過橋米線，用熱力將肉整熟！！！


當我見到呢一個過橋米線之後，即刻對坊間咁多間連鎖店既過橋米線完全冇興趣，你唔覺得譚仔好難食嫁咩？求ｑ其比ｄ湯，比ｄ豬潤咁，就好似將米線拜到天咁好食，其實其中一個原因就係平之麻！！！
講返呢個先，真係出奇咁大件，可以睇睇尾三圖就見到個比例了。我都係食完先知，原來雲南米線冇食酸菜嫁，咩芽菜酸菜都冇，所以呢，未食過正宗既米線真係唔好話個ｄ翻版好食丫！！呢個米線比起之前個兩樣菜淡，個湯都係一般，唔係太油，都可以接受既，但配料真係幾多，食完呢個都幾飽了。

食物評分：★★★★★★★☆☆☆
是日消費：約$135/位 (2位用)

合成 @ 九龍城《當潮人用潮語賣糖水》

潮州合成甜品
九龍城龍崗道9號地下，23833026

話說上一回，我同我屋企人去九龍城食左禾牛薈，我個肚已經係炸裂緊，但我家姐依然話要食甜品，究竟女人個肚係唔係分開左個胃係放甜品呢？我個胃已經頂到上心口喇，我只係想返屋企訓係度咋，坐已經坐唔到了。好啦，個家姐話叫我黎食呢間，我又未食過呢ｄ，咁就即管試下丫，阿爸阿媽就話要返去訓覺，咁由得佢地啦！

去到，同我預期一樣，都係食中式糖水，千祈唔好食西式丫，害死你丫！
佢呢度出名清心丸，乜鬼野黎嫁，正常人一聽個名，就會諗會唔會係一粒圓圓既，入面有料既野，似細粒湯丸咁呢？如果你同我一樣咁諗，我諗你一定同我一樣未食過了，原來，清心丸係咁嫁！



解剖清心丸，最頂的透明狀，長方立體，睇唔到就按圖放大啦！咬落去個下好似食緊o者喱同蒟蒻合體平均既硬度咁，真係幾得意，又冇涵咁，得個爽咁囉，佢碗碗野既方式好似車仔麵咁，哈哈！


綠豆薏米西米蓮子ｘｘ清心丸（太長喇個名）（＄３１）

好多料，亦好貴，本人覺得麻麻地值！


腐竹薏米清心丸（＄２２）
冇食到丫，唔評呢個


雪耳蓮子清心丸（＄２３）

呢個我叫的，我睇完成張ｍｅｎｕ，我都搵唔到一樣我好想食既野，因為我好少食中式糖水嫁，食最多都係得芝麻糊個ｄ，潮式就更少！今次黎呢度食，真係又令我擴闊左眼界，其中一個原因係，你根本唔知個店員講咩嫁！佢講潮洲話，講一大輪都唔知ｕｐ咩，好似估歌仔咁！我想要凍既，佢又話咩加冰，加冰點食丫，之後就叫左熱既算數了。

不過，佢地既糖水幾清丫，食完真係幾潤，冇西式咁凍胃，真係幾好的，可惜太飽了，唔係應該會幾好食！

食物評分：★★★★★★☆☆☆☆
是日消費：$31+$22 +$23

禾牛薈＠九龍城 《零劣評的火煱店》

禾牛薈火煱館
九龍城南角道36號地下，2383 9863
推介：特級肥牛，稻庭烏冬，老友鬼鬼

哈！今日去完將軍澳拜山，就book左六點半係九龍城打邊爐。點解我黎呢一間呢？因為我其實對九龍城既火煱都幾有興趣嫁喇，可惜成日都冇人陪我黎搵食，唔通２個人打邊爐食海鮮咩，邊食到咁多野丫？所以我之前幾日就訂左呢一度黎一齊做下白老鼠，哈哈！真係有人陪我一齊玩啵！

一家人黎到九龍城食飯，原來佢地真係好少黎到九龍城，連有咩車都唔知啵。咁又係既，九龍城冇地鐵丫麻，不過巴士真係好多，度度都去到咁滯。今次特登一家人出黎食飯，仲要少有地係我埋單，其中一個原因就係我阿爸阿媽結婚三十週年了（請唔好估我幾多歲，我阿媽好遲先生我嫁！）佢地兩個真係唔覺唔覺就咁多年了，成日係度嘈嘈閉，哈！可能呢ｄ就係佢地溝通既方式啦，今年多左位姐夫，食飯傾計都多左話題丫，哈哈！！

唔好講咁多喇，一於就睇下有咩正野食先啦，我淨係打名都有排打丫，去片！！

蝴蝶蚌 ($78)


呢個成隻放入左個煱度，攪到個煱好多沙，建議最後先落落去，咬一啖個時，傻仔左連黑仔都咬埋，攪到成口都係沙，唔食個舊野，真係一粒沙都冇丫，肉質幾甜，幾正丫。


大連鮑魚 ($18/只)

呢個鮑魚都幾抵食丫，推介之一。我都唔係滾左好耐咋，就想試下佢肉質，都幾彈牙，拎黎打邊爐都唔錯丫！同埋佢都洗得好乾淨，雖然有一兩隻死左！幾新鮮，唔錯！


花膠北海道牛乳 拼 豬骨湯底 ($88+$20)

我第一次拎牛奶黎打邊爐，佢話就話北海道牛奶，都唔知係唔係真嫁啦。不過，我地讀書個時教過，牛奶一過左１００度就會冇哂佢地中間既ｂｏｎｄ，即係食左都唔會有益嫁啦，所以拎黎打邊爐都係貪過癮姐，實際功用不大。係呢，佢真係會另上足料湯底，完全唔使怕叫左兩種湯底少左ｄ料丫，個豬骨都有四大舊。

話時話，個牛奶幾好飲，我飲左幾啖。


雙影夜明珠 (龍眼肉+蝦滑/墨魚滑) ($68)



呢個係其中一個攪鬼菜之一，我都冇諗過龍眼可以拎黎打邊爐，佢都整得幾有心思，熟左之後甜甜地又幾得意，唔好處就係太少喇，幾個人唔夠分丫！！

花膠 (湯底送)

阿媽話呢ｄ好細喎，同佢出黎食飯硬係話呢樣又唔好，個樣又唔好喇，佢仲麻煩過我丫！我就串佢喇：係丫，呢度又冇魚翅食，返去食到夠啦你！　ｗａｋａｋａ！

粟米加牛柏葉

冇黑柏葉，食住ｄ漂白水牛柏葉呢ｄ粗野先啦！！

脆鯇骨腩 ($45)

我打邊爐都幾怕食有碎骨既東西嫁，呢個係其中一個，我都係食左半舊就算了，因為大把野食丫麻，呢個熟左都幾脆，幾鮮甜，可以一試，不過真係有碎骨，小心丫！

老友鬼鬼 (油炸鬼+蝦滑)($48)

必食推介之一！今次佢用左油炸鬼釀蝦滑，真係好出奇，唔食過都唔知咁好食，滾三秒就食得，幾得意丫真係，不過咁細條油炸鬼都係第一次見咋！

特級肥牛(大) ($98)

必食推介之二！肥牛真係好靚，件件脂肪比例剛剛好，入口鮮甜肥美，我食到唔停得口丫！


鮮味帶子串 ($50)

我成條放左入去滾，五粒，一人一粒剛剛好！夠肥大，夠爽，都幾正的！！


日本黑豚肉 ($78)

哈！呢個我又覺得幾貴啵，初初我仲以為有廿幾片添，點知係得幾片，個幾片都幾貴啵，十幾蚊一片，哈哈！！不過呢個又幾甜，我都係滾一陣，好似食牛肉咁食。ｄ野新鮮就點整都好食既。

自家製手打蟹子墨魚滑

呢個墨魚滑都幾好，幾彈牙，墨魚滑係我最愛打邊爐之一！


水魷 ($35)



精選六寶丸 ($98)

普通丸仔囉！哈哈～


稻庭烏冬 ($22/2個)

呢個烏冬丫，真係要點丫，我食左一個先醒起要影相，初頭我以為烏冬係一般貨啦，點知，我點左先知原來咁好食！佢個稻庭烏冬真係好煙煙韌韌，浸落牛奶湯真係好正丫！你有冇食過牛奶烏冬丫？冇就要去試下丫！之後我問番個老闆，點解你地既烏冬咁正既？佢就話係citysuper買既，淨係個度有得賣喎，叫大ｘ代理，鐘意食烏冬既朋友就去睇下丫！！

仲有丫，我睇過最平都要３３蚊／３個，即係佢賺好少咋啵～

椰汁西米糕(免費)

呢個唔係幾好食...一pat野咁....

食物評分：★★★★★★★★☆☆

是日消費：$220/位(5位用)

五代同糖@銅鑼灣 《心太軟再遇強敵》

五代同糖
銅鑼灣告士打道250-254號伊利莎伯大廈G11舖，3486 8528
推介：心太軟

今次介紹呢一間呢，其實對我黎講係冇咩興趣嫁，點解？因為我上網見到個間店既相，又好似一間普通茶餐廳咁，心諗：點會好食嫁？唔通入去食公仔麵咩？
之後，我再認真咁睇下佢出ｄ咩甜品，心太軟丫，焦糖布甸，雞蛋布甸咁，睇落都ｏｋ咁啦，但一心覺得心太軟點都唔夠灣仔個間〔喇邦〕好食嫁喇。所以抱住冇咩希望咁入左去。

記得上網睇左，點左一定要點既雞蛋布甸，果凍，同埋心太軟，至於好唔好食，就請睇埋落去啦！



雞蛋布甸

一黎到，我影左幾張相之麻，個ｆｄ已經〔支支阻阻〕咁話要食，哎呀，唔好嘈我就唔使係咁ｒｅｔａｋｅ　ｄ相啦，攪到好多都手震。一影完，就叉左隻匙落左去，我都未拎起隻丫！！
試下先，ｕｍ．．．．幾滑，唔會太甜，幾正，食到底呢，會有水狀的焦糖流出，佈滿了成個布甸，個時就甜左少少，都可以既，而最底係接近固狀既焦糖，個ｄ就太甜了．．
呢個整體黎講都幾高分嫁。

益力多果凍

三樣之中，呢個算係一個幾平凡既甜品，好濃既益力多味，算係幾滑，又唔太甜，不過就普通左ｄ。

心太軟

心太軟佢用心心碟，真係幾有心思啵。佢呢個心太軟唔算太甜，一般個ｄ控制得個濃度唔好，就會太濃同太甜，尤其煮既過程。呢個真係唔算甜，做到形似，夠濃，外層同餅底有少少脆，整體黎講，比起而家既ｌａ　ｂｏｎｓ，應該係呢一間好食過佢喇，但比起以前既ｌａ　ｂｏｎｓ，就唔夠佢多朱古力漿。

整體黎講，我唔會再帶有色眼鏡對呢間甜品店了，呢間我比左個信心佢喇！！

食物評分：★★★★★★★☆☆☆

是日消費：$20+$24+$38