黃大仙鳳德道15-17號地下，2726 3818
推介：改良版擔擔麵
其實呢一間自從我想搵周圍食野既時候，呢一間一直都係我想試既其中一間，就係因為佢夠出名。較為有經驗既前輩，一定知我講邊一間，前身好似比個時既城市追撃訪問過，係一個樹林入面食，個度清拆左，就開左幾間分店，而黃大仙就係其中一間了。
佢呢度出名擔擔麵，我當然要試下好唔好食啦，好多時出名既餐廳都唔代表好食嫁。去到個度，見到成條街都黑沉沉，唯獨呢一間好光猛，店外仲坐左好多人等位。等左廿分鐘左右，終於入到去了，咁我就點左幾樣菜，睇下係唔係真係咁有料先。
花生
餐前影的，又真係幾脆同埋鹹鹹地，幾好食！
小籠包
小籠包，一定要汁多，熱，皮薄而不穿，外觀靚，是但缺少左一樣，個個小籠包已經可以不合格！
係呢一間，由相已經睇到，個外觀唔一致，未食已經扣左二十分，一夾起，我通常會睇下個底，如果個底好似個膠袋裝住水咁，咁就叫皮薄汁多，咁就一定靚。但呢一間做唔到，只不過係有小小弧形，皮都還可以，但個汁唔算多，亦不是上級之選，合格只係因為佢個汁夠熱而已。
鎮江肴肉
呢個其實都冇乜話功夫可言，只係選肉夠平均，都可以做到幾好味嫁喇，咬落去既感覺好似食緊午餐肉既凍版咁，還算一般吧。
雞絲拉皮
上海野就一定有呢樣菜，食呢個其實都唔係食緊粉皮，係食緊佢個ｄ花生醬，其實諗諗下幾似腸粉加麻醬凍食，冇技巧的，都合格吧。
改良版擔擔麵
改良左其實比之前大少少同埋有肉碎，但咁就成３０蚊，有ｄ貴。不過，係好食既，應該係我食咁多擔擔麵之中既較接近上級既級別，因為食左之後完全唔口渴，唔滯，此其一，麵真係打出黎的，見到麵煙煙韌韌，功夫到家由此可見，湯濃而有強烈花生味，我真係飲左好多湯，掂！
太后碗豆王
用黃豆加大菜糕之類既凍點，飯後食都算係ｏｋ既，又冇人地寫得咁誇張，咩驚為天人，咁鬼白痴！
總結：呢間食完你好走喇，坐多一陣都唔得嫁！！！
食物評分：★★★★★★☆☆☆☆
是日消費：189 (2位用)
