大婆牛肉麵@九龍城

大婆牛肉麵

去完台灣之後，一直都好掛住永康牛肉麵，如果佢黎香港開分店，我一定會衝過去幫襯。可惜，係香港，一條街都係賣同一種食品真係好少見。如果真係有咁多間競爭，我相信一定可以整到好高質素了。
而呢一間，係香港既牛肉麵都相信係五名之內吧，呢一間都係仿傚台灣既牛肉麵，九龍城黎講，佢都算幾出名嫁喇。

大婆牛肉麵

入口好淋，湯都好濃，但認真飲多一啖就覺得有少少口渴，唔通湯中有味精？！我只可以講，係似台灣個ｄ牛肉麵，但如果呢間野去台灣開，一定比人打低～同永康個間差太遠，人地淋中有咬口，唔似佢呢間咁淋，湯也真正用牛肉湯，我個時係差唔多成碗湯飲哂，呢一間只係幾啖，差得遠丫！

不過，香港黎講，我會比好高分，因為地點所限吧。

是日消費：$45/碗

川福@尖沙咀

川福
尖沙咀加連威老道100號港晶中心地下65-66號舖，2369 1311

前幾個月先開張既餐廳，係理工大學附近。一直返學放學都都發現唔到，而上網搵鳥冬就搵到呢一間。本住咩都要試既精神去試左呢一間，收費都算幾合理既。


雞肉湯烏冬

本人覺得真係 [整定] 既，雞肉都開始硬了 =.= ，不過烏冬還可以既，仲有煙韌既感覺，係個湯好似馬虎左少少。

帶子海鮮烏冬

似車仔麵既海鮮烏冬，好似咩都用滾水整完之後放入去咁既感覺，因為正常海鮮點會出到呢ｄ湯出黎嫁。

餃子芝士燒

絕對建議係有咁快得咁快食左佢，因為凍左係一定食唔到，硬哂好嘔心既。味道幾濃，餃子好似韓國年糕咁，咁煙韌。不過～超油囉，食左唔知會唔會肥幾磅嫁 ~ 只算係合格貨式，因為幾靚。

鮮蝦天婦羅

呢個都唔係炸得好令，因為紙上充滿了油，不過隻蝦都可以丫，咁多野黎講呢樣算係最高分。

是日消費：約75/位

鼎泰豐＠銅鑼灣

鼎泰豐
尖沙咀廣東道30號新港中心3樓130號，27306928
銅鑼灣怡和街68號地下 ，31608998

又到星期三銅鑼灣搵食記，今次黎到既係鼎泰豐，因為有次無意發現，佢開左黎銅鑼灣。咁就當然要試一試啦！講起鼎泰豐，係台灣或者係尖沙咀個間，我都試過了。最出色都仲係台灣個間，個小籠包個湯係熱既！反而香港兩間都做唔到呢個水準，最頂多都係暖既姐，差好遠．．．淨係呢樣野都比下去，咁其他野好食極都有限公司了。

呢一間，比尖沙咀個間，再下一成，即係再跌多10%，但價錢好似比個間仲貴ｄ，開始有ｄ唔鐘意呢間野了。

酸辣湯

呢個竟然比我想像中冇咁辣，其實要辣到媽媽聲先正嫁麻，呢個比較遜左一點。

台式麻醬麵

食個時，挾個時，ｄ麵好似未煮過咁，痴埋一餅野咁，有ｄ失敗喎！

蟹粉小籠包

呢間仲衰過尖沙咀個間，都唔夠熱既！我成隻入哂口都得，只係暖暖地咋啵！蟹粉係香，但冇我expect咁好食囉。

紅油抄手

呢個我唯一一個可以同小籠包有得比，呢個又辣又鮮味。如果要我推介，我一定推介呢個而唔會推介小籠包囉。

前：鮮肉包

後：菜肉包

兩個包都好食，２個都夠熱。菜肉就比較清既，應該係白菜仔黎既，鮮肉濃豬肉味，點呢兩個可以互相配合，都係一個唔錯既組合。

P.S. 埋單我本人覺得比較貴，食個少少野要二百幾，正常既我係唔夠既。我唔係覺得個價錢貴，係個價值貴，正常黎講，食呢ｄ野，最合理應該係一百八十左右。所以，我應該好難會有下一次了。

是日消費：$237 (124/位)

萬家燒餅皇@旺角

萬家燒餅皇
旺角登打士街43P-S號鴻輝大廈地舖，23325833

呢一間對為食既我黎講，一早電視未上我都已經有留意丫，不過次次黎親呢度，我ｄ朋友都唔會想食既，我就算話請都唔食既，咁一個人食呢個又太飽，就冇試過了。今日，同個朋友講，我一定要試下呢一間，唔食好似對唔住自己，交唔到功課咁，今次就拿拿聲當食左一個下午茶咁丫，呢間都合格既！

武大郎

我只係叫左一個武大郎 咋，因為個ｓｉｚｅ好大。其實我都唔係太知佢用緊咩肉，似豬肉囉，加左少少胡椒，似台灣既胡椒餅，不過冇佢咁熱同咁重胡椒味，呢個比較淡，不過真係好多肉，同好多油！合格分係會比既，可以再進步既空間！

是日消費：10/件

HIPOT@觀塘

HIPOT

觀塘觀塘道418號創紀之城5期6層L6-3號舖，31481313

觀塘，我真係去過好多次喇，基本上有咩食肆我都算係幾清楚了，而呢一間唔知係唔係新開呢? 定係我好少留意呢，一直都搵呢間去試下。好在我上網睇過下，知道呢一間餐廳既名氣，所以就去試下新野了。

位於APM既頂層, 開放式既飲品同甜品櫃，格調好適合年青一輩。呢度雖然唔係任食，但係野飲就加12蚊任飲，其實APM黎講都算幾抵嫁喇。又有加15蚊有肥牛，仲有其他著數，一小時食完就8折，1.5小時就88折，日-四9時入座就6折，五至六10時入座就6折。我8點半入去食既，不過，就7點左右已經排緊隊，都幾哂時間嫁。



海蝦

其實為數都唔少嫁，不過個人認為麻麻地，唔太新鮮，不過以量取勝姐。


海鮮盆

初初我以為叫錯左，見到擺到咁，以為食緊刺身，點知係要熱食既。呢盆野不過不失啦，冇咩名貴野，又冇咩特別野，又冇咩驚喜咁，都 ok 新鮮既，但未致於我有衝動食哂佢囉。

蔬菜盆

上：魚肉豆腐

下：蜂巢豆腐

原來好食既野，呢度一定要自己點既，不過，魚肉ｗｉｎ蜂巢。對於上面個套餐，我比較ｂｕｙ　ｄ特別ｄ既野，始終我都係一個屎坑精，鐘意試新野，呢個魚肉豆腐係豆腐面，但係食落好似食緊魚蛋咁，都唔知攪乜鬼，咁得意既．．．

魚皮

我見到人地點左好似好正咁，我又點一碟試下。好正啵！要黎浸湯都幾ｏｋ嫁，不過飽到食唔哂～

美國肥牛

１５蚊一碟，我叫左３碟，算係幾抵食丫，不過份量好似少左ｄ，好快就清左一碟了。

沙嗲湯底

好濃的沙嗲，食完好燥底，哈哈！

豬骨湯底

真係有舊大豬骨，算你有ｄｄ誠意啦～

食完之後，我飽到有ｄ想嘔．．．．．

是日消費：$145/位

泰簡單@銅鑼灣

泰簡單
銅鑼灣謝斐道517號總統戲院頂樓，28382896
推介：皇宮大蝦蛋網炒貴刁

每個星期三，因為要去銅鑼灣返學既關係，我一定會係銅鑼灣搵食。已經經過左好多個星期，係銅鑼灣都食左不下十數間餐廳了，有時真係想諗下，下個星期點算呢？已經冇新餐廳而又好食既，開始淨係諗呢個都諗到頭痛。

兩個人食，點左三樣野，又一次飽到想嘔咁。個份量都幾大，相對上個價錢都成正比，比起一般既泰國餐廳貴少少，畢竟呢度都係銅鑼灣，我又唔咁在乎個價既。

金枕頭

初初見個名，真係以為係榴槤，望真左少少先敢叫，原來係麵包加咖喱汁再加好少既海鮮。其實真係包加咖喱汁，就比人捧到天咁高，話咩一定要食咁，特別又唔係真係咁特別，料又唔係真係咁多，但價錢貴左ｄ，要８８蚊。不過，我又要講返句公道說話，佢又配合得幾好既，上脆下軟，個麵包入哂ｄ咖喱汁味，令人食完一舊又會食第二舊囉。多人食既話可以試番碟既。


蛋包時蔬

想睇下有咩時蔬，原來係雜豆多既。呢個菜就少少酸味既，有菜心，雜豆，少少蟹柳，蘿蔔絲咁。其實真係冇咩特別既野，係個汁酸酸地，送飯就幾正既，可惜冇叫飯呢。

皇宮大蝦蛋網炒貴刁

呢個算係我最欣賞既一個菜，因為可以比我影下相。個網佢又整得幾靚啵，蝦都算新鮮，又有少少辣粉點，少辣同埋鹹鹹地咁，都炒得幾香幾正丫，最花功夫應該係呢樣喇。

前：奇異果橙汁沙冰

後：芒果沙冰

是日消費：８８＋６５＋８５＋１８（２杯飲品）＋１０％

　　　　　約$150/位

明師傅甜品@荃灣 (黑名單)

明師傅甜品
荃灣眾安街136號地下

呢間野黑名單冇情講 !

事緣我同朋友一路都有行開荃灣，呢間開店個時我都有幫襯過，一直都覺得係合格既水準，係我既角度，係我手上拎到合格都唔係一件容易既事，我自問都唔會有偏幫既成份。

但琴晚有個朋友話未食過，就去試下囉，一就唔試，一試就把幾火。

我去到就叫左個黃色潛艇（轉黑珍珠），佢同我講冇芒果雪糕，我都有少少不悅嫁喇。之後拎到黎，我真係啞哂！我個晚冇拎相機，講唔到個份量，佢係得２舊過期芒果加２舊菠蘿加一舊雪糕，收我２４蚊？　你間野係唔係傻嫁！我比１５蚊比埋你個鋪租都比多你丫！

之後我食左一半就冇食到，叫埋個老闆娘同佢傾，話佢係唔係轉左老細，攪到咁冇水準，佢話加番幾舊芒果比你丫，我話唔使丫！你估我好恨你舊過期芒果丫？

黑名單已入！
如果有得比分，十分滿分的話，我一定比負二!

劉森記@深水埗

劉森記
深水埗桂林街48號地下，2386 3533
深水埗褔榮街80號，23863533

每一次我去深水埗，我第一樣想食就係呢一間，劉森記。我已經食左３次了，次次我食完都好想食多一次，因為佢地既蝦子真係好吸引我，每一次食完都滿口都係蝦子味，真係好滿足的。到而家為止，暫時到而家都未搵到第二間既蝦子麵可以同佢較量一下，佢呢度唔單止蝦子出色，其他配菜都一樣咁正，我打完呢篇食評又想食多次了！



豬手蝦子撈麵

揀呢個，其實我想試下用彈既角度去食嫁，因為次次都比佢拎滿分，個條氣唔係咁順丫麻。想用豬手呢個比較難整既，落一落佢個面。點知，真係冇得彈佢，豬手好重上湯味，蝦子夠香都唔在講啦，仲要好似唔洗錢咁落咁鬼多，麵夠彈牙冇鹼水味。今次真係唔比滿分都對唔住自己啦，澳門個間黃枝記死埋一邊啦。

是日消費：$28

Table 18@觀塘

Table 18 Bar & Restaurant
觀塘觀塘道418號創紀之城5期大堂上層UC-1號，3148 9444
推介：磨菇雞肉腸

今日好唔開心，本來約左一大班人去cafe　一齊好開心咁玩，但因為一ｄ原因，而要被迫取消左。我個人個時真係好ｄｏｗｎ，因為我自己真係做左好多野，估唔到咁就取消左。之後諗住，既然都約左，都要出黎食野嫁？　咁就去左ａｐｍ食，想食呢間係因為有位同事介紹既，我見個評語唔錯，就去左試一試。

我有時都發覺自己都幾細路仔，一食到好食既野，就好開心，尤其係食甜品。所以我好主張食完飯食甜品，好食既甜品會令我好鬼開心，咩煩惱都唔記得，只係記得點好食。


蟹肉菠菜捲筒通粉

其實佢一黎到，我好想問佢ｄ通粉係邊？因為我面前個一碟好鬼似菠菜腸粉。一大塊粉皮加菠菜，茄汁酸酸地又有芝士味，都幾ｏｋ既， 不過份量就略少左ｄ姐。

(小食)豬仔肋骨

燒得都算幾惹味既，不過就太熟喇，攪到有韌韌地。佢個燒汁都幾ｏｋ既。ｏｖａｌｌ會比合格既。

酥皮龍蝦湯

認真講，呢個都冇咩料既，好似齋湯咁囉。酥皮都還可以，都幾鬆化，不過個湯就遜左少少。


磨菇雞肉腸

中間個部分係一ｄ薯蓉煎香左，再用鐵板上，都幾得意幾特別嫁啵，不過就油左少少。如果咁多個菜，我會比呢個最高分。呢個小食係咁多個最出色最特別既。

是日消費：118/位

麵屋一平安＠尖沙咀

麵屋一平安
尖沙咀彌敦道132號美麗華商場2樓11號舖，2375 5330

今日特登去尖沙咀搵一搵ｃａｆｅ，睇下有冇一ｄ好正既ｃａｆｅ可以一大班人去玩，可以約出黎聚會咁囉。
因為見到尖沙咀冇咩ｃａｆｅ，所以行左一陣只係ｂｏｏｋ到一間咁姐。

出到黎尖沙咀，又點可以唔善待我個五臟廟呢？我上網搵左一陣，覺得呢間好ｏｋ咁啵，咁就入左去試下，不過，事先聲明，請認住呢一間，因為只有呢一間先好食嫁咋，其他分店都唔掂！

日式煎餃子

外層少少脆，又少少煙韌，入面仲要幾熱下，真係唔錯，唔錯！

特制什錦豬骨湯拉麵

呢個真係唔錯啵，湯夠濃，好明顯係豬骨濃湯，唔係個ｄ味精湯，我飲左半碗都有，完全冇口渴既感覺，呢個真係值得一讚既地方。另外就係佢既叉燒同豚肉都好淋好入味，仲要好大碗，呢個真係正！

日式燒餅

燒餅咁簡單，對於呢間餐廳，合格都唔係一個問題黎既。不過就勁多千島醬「質」飽我囉，賣相一般，但食落去既熱度，軟度同厚度都幾正既。

汁燒魷魚

佢ｄ燒汁少鹹，就帶出魷魚本身少少鹹鹹既香味，呢個都整得幾香，燒汁都唔錯。

是日消費：約 89/位

北海道十勝豚丼@旺角

北海道十勝豚丼
旺角通菜街威達商業大廈1A-1L,E及F舖，2374 5050

唔知點解，我開始發覺我搵食既地方係一排排咁既，某一兩個星期就會去某一帶既地方搵哂個度有ｄ咩好食，之後冇就會轉地方了。今次同個朋友去左旺角，我真係好少係旺角食野，因為一直都覺得冇咩野好食，不過近排搵開係通菜街，即管入去搵下有冇ｄ未食過又好想食既餐廳吧。

呢間本來我都係一般，正常黎講我都係只會望一眼就閃，因為完全吸引唔到我。但好可惜既係，個朋友就偏偏比個死人滑蛋豬扒吸引左，反正未比個機會呢間野，比一次咁多吧．．


滑旦吉列豬扒飯

我仲未搵到我心目中既滑旦豬扒飯，呢間又肥佬！！我既要求真係好簡單，就係要塊豬扒上面係脆，就係咁簡單姐，點解間間都做唔到嫁．．．

十勝厚燒豬扒飯

聽個名好似好勁咁，食落去，有冇搞錯丫！又韌又硬又實！<-（好似係同一個形容詞黎）大佬丫，完全唔掂，收檔啦，主打既都做唔好，相信你好快摺得。

是日消費：約50/位

土屋＠旺角

土屋
旺角通菜街 2Q-2Z鴻輝大厦地下5號舖，23326990
推介：原味木慷布甸。

一月一日特別版！

我食完上一間甜品之後，我同個ｆｄ講，我唔夠丫，想食多一樣，之後佢話叫我拎餐牌，諗緊之際，佢問我不如食木槺布甸，我個腦即刻可以ｌｏａｄ到出名木槺布甸既所在地，我話個間野好得嫁，一定要去試下丫．．．．咁就黎左土屋了，只不過係轉左兩個街口。

我發覺左自己一個特點，當野食唔好食既時候，彈三彈四，又唔食咁，相信好多朋友都知道，我個名都愈來愈臭，就算係人地特登整既，唔好食都冇面比既。但如果好好食我又會點呢？相信都好少人見過，我就會：嘩～～～呢個緊要～！喂喂，呢個唔好食，我幫你食埋佢！當聽到呢句野，個件野都有９０分以上嫁喇！

呢間做到呢個水準，好野！


朱古力木慷布甸

所謂既朱古力，只不過係有ｄ　ｏｒｅｏ既餅碎，其實係感受唔到朱古力，有少少取考咁囉，不過整體黎講，我依然都係咁ｂｕｙ佢！


芒果木慷布甸

講真的一句，我完全感覺唔到有芒果味丫，點解會咁既，我明明見到芒果肉．．．雖然個感覺冇怪怪地，但我都係鐘意原味個個。

原味木慷布甸。

一入口，我嘩左出黎！嘩！之後個朋友就問我，好唔好食丫？我話，呢個唔好食，等我食埋佢，你食呢個奶凍啦。呢個真係正，正係邊？佢似係瑪利餅做面層加兩層云呢拿雪糕整成的，感覺似食雪糕，但外層又感覺唔到有雪糕咁既感覺，真係只係點木慷布甸就得嫁喇，其他可以唔點嫁喇，實在太正。

原味奶凍。

奶凍，味淡，有鮮奶味，不過都係好淡，唔夠濃郁。
滑也不夠我想像中滑，同義順比的話，應該輸９條街。
味淡，不太滑，比分比到盡都係得合格（不如唔好賣呢個啦，仲話最出名=.=）。

是日消費：約２５/位

溏苑@旺角

溏苑
旺角廣華街3號百利達廣場地下1號舖，21714913

一月一日！！

咁開心既時刻邊可以由佢停嫁，一定要去食甜品丫。由於本人開始唔抵得糖百府橫行，所以開始想搵一ｄ自己未食過又想食既甜品。並將糖百府打入冷宮，因為開始覺得呢間野冇咩新意，要ｃｈａｎｇｅ！

所以就揀左佢對面個一間糖苑了。其實我覺得佢呢一間比糖百府好既地方就係多選擇，待應又ｎｉｃｅ。不過唔好既地方都係來自同一個好處，就係多品種。即係等如冇突出～冇突出，樣樣都聲稱好好食，咁作為客人既我，一入到黎，叫你介紹幾樣好食既野，你就求其指幾樣，叫我邊有信心呢？仲要好多範疇，焗，燉，雪糕，糖水，乜都包哂，比人既感覺就係唔專業囉～當人地問：呢間出名咩？我一定答你唔到～！呢個就係一個好大既缺點，要人認同必須要搵到你自己甜品店出名既食物！



雪地芒芒船

其實有幾個幾吸引到我既，其中一個就係呢個。我好奇怪嫁，如果我去到一間唔識點野既甜品鋪，我就會點芒果，因為一定係最安全的，我又唔抗拒的，難食極都有限丫麻。

呢個都算係一個幾花巧既甜品黎既，有雪糕又有芒果粒，又有布甸，又椰果咁，都幾得意丫。由於呢個甜品係〔砌〕上去，我都唔可以比太高分，合格多少少吧．．．至於味道如何？我講都冇意思啦，冇酸既芒果囉，唔通話有芒果味既雪糕咩！我唔講都估到咩味啦。



蜂蜜玉桂香蕉窩夫

呢個野一出，大佬．．．咩味丫！好大陣王桂飄過黎，我幾想轉檯食丫真係．．．不過個陣味食落又唔太覺啵，個窩夫脆脆地，又幾有水準啵，如果佢有朱古力醬就正哂！！！！我一定比滿分佢。

是日消費：３２＋３２（２位甜品）

意日菜@旺角

意日菜
旺角通菜街地下

一月一日，大新年丫，我太過痛恨０９年喇，所以今日一定要出去呼吸下新鮮空氣，同阿爺飲完茶之後，一ｃａｌｌ個ｆｄ就出到黎，嘩，呢ｄ ｆｄ係邊搵丫，對我咁好。當然，我都會好好報答佢，一早為左佢準備幾間好食又唔使ｂｏｏｋ位既餐廳比佢ｔｒｙ下。我又詐詐帝咁問：不如今次你搵一間餐廳丫，（想將個波交比佢），點知，佢一諗就半個鐘．．．．都係諗唔到啵。之後我玩完就帶左去一間食意粉既地方。

不過，其實呢間野好普通．．．．合格都未到。

放上黎ｆｂ只為左一個原因，就係平。兩個人食左一百零四蚊。唔食小食應該９０有找，咁平．．．我諗旺角都應該好難搵掛．．．．

ｐ．ｓ．如果你認為我咁就算數既話，咁就大錯特錯了，因為下個食評既２個甜品店先係今日既主菜。



炸三文魚餅

呢個應該係佢整得差同我唔太鐘意三文魚熟左既感覺，好[鞋]丫，頂佢!亂Q 咁黎炸，我真係頂佢丫....
千祈唔好要呢個!

千層闊麵

佢聲稱既主打菜式。

我諗都係算數把啦，粗粗地食住一餐都唔係咁大問題既。佢上層係芝士加薯蓉，下層係千層闊麵加肉醬意粉，我就冇咩興趣喇，有興趣就你試埋我個份。

咖喱豬扒石頭煱飯

咖喱豬扒飯既石煱版，根本同荼餐廳既冇分別，好彩既係佢仲有少少心思整熱佢囉。我可以比佢合格既，如果計埋個價錢，因為呢種野好難整到難食嫁，同埋真係幾抵。

是日消費 : 52/位