霞飛拉麵小籠包
尖沙咀河內道18號K11購物藝術館B226-B227舖，2801 6111
推介：小籠包
休息左幾個月，黎一個強勁推介吧，相信咁多位睇我既網頁，都好期待我既作品嫁喇。
今次既推介，本週一來就打入必食之選！霞飛！
點解咁講，我就賣個關子，你睇落去就知點解嫁喇。
不如講番點解黎左呢間食野先丫，
係咁既，尖沙咀近排一開就開左三間重炮的商場，其中一間就係Ｋ１１。
入面主要都係以藝術為主，好多作品比人影下相，增加你既藝術氣質！
而呢一間店就係開係呢一度，名為霞飛，連個名都藝術過人。
點解我會揀呢一間做白老鼠呢？因為我想試多ｄ中式既菜，擴闊食物既種類，而呢一間上海菜正正合我心意。
上網睇呢間店已經知道呢一間出名食小籠包，黎到當然要試下啦！
好喇，開場白講完，睇主菜吧！
花雕醉雞
呢個真係唔係幾得，原因有三：其一，凍既，最起碼都要雞或汁都要暖暖地丫，點知都係一句，凍既！其二：韌既，冇鮮味，冇雞味，仲要韌既！其三：唔配，得個皮有酒味，完全係上碟先有用酒放上去。三大缺點，都唔會比佢合格嫁喇。
紅燒牛肉麵
牛肉，認真地講，真係幾淋幾入味，雖然麵湯湯底比較清，但牛肉湯底濃郁，飲兩個湯時有唔同感覺，都算唔錯。麵質係上海麵，麵質唔會係彈牙，只會係比較淋身個隻，我都見到師傅係開放式玻璃阻隔的廚房拉麵，所以都應該信係自己拉嫁喇。
小籠包
真正既小籠包係真係比較厚皮ｄ，如果下次各位食到咁既小籠包，唔好一下子就話人地唔正宗丫，會比人笑嫁。而點解每一次食小籠包，我地都要求皮薄餡靚呢？我相信係關於香港人飲食要求高有關喇，正如雲吞麵一樣，同樣價錢，梗係食粒雲吞大粒ｄ嫁啦，點會理正唔正宗先！
講左咁耐，仲未講呢個小籠包添，呢個其實就好配合香港人的小籠包，皮薄餡靚加多汁。好老實，我食左咁多間小籠包，都冇一間比到個驚喜我，一係就唔夠熱，一係就冇咩汁，最後真入到圍既，只有紅磡飽餃店，各位食慣既，一定同我講頂ｘ風好好食丫，我都係覺得台灣個間好味ｄ。呢間霞飛可以做到皮薄而不穿，多汁而不油，就連一挾個頂部，成個膠袋咁弧形，仲隱約見到ｄ汁。嘩，剩係咁都有８０分，一口咬落去多鮮肉汁且夠熱，唔點醋我都可以食哂。
食完呢間小籠包，其他全部可以行開喇。
炸香蔥酥餅
比較香口既酥餅，外脆內軟的夾餅，有ｄ似叉子，不過餡料係肉碎，幾得意，不過食四份一個就夠哂了。
灌湯牛肉餡餅
牛肉餡餅既肉汁唔多，相比小籠包，個ｄ汁仲多仲豐富，但呢個既重點係牛肉度，根本成個都係牛肉，好滿足的牛肉，都值得一試既。
食物評分：★★★★★★★☆☆☆
是日消費：約 $270 (2位用)
