韓食家 @ 葵芳

韓食家
葵芳興芳路223號新都會廣場5樓501-510號舖，2610 1880

今日去葵芳行下街，食野個時考慮緊風月堂定係呢一間。當然，最後一定係呢一間嫁喇，因為我都幾鐘意食石頭煱飯既～

葵芳真係少左好多野食丫，其中一間都幾出名既，我可能會再去影一影相既，叫金潮小廚丫。除左小廚個一間，我都諗唔起有邊幾間特別好食丫，所以叫我介紹呢一區，都係一件幾煩惱既事丫！

呢間個位就係百人一朱改建既，呢間都位置都幾大，幾多座位，由於唔想食燒野，就點左幾樣小菜。

韓式炒粉絲

一個普通既炒粉絲，我相信一般韓式地方都有既炒粉絲．．．


人參雞湯，都冇人參既苦苦地既味既，我以為自己飲緊雞湯，不過真係有半隻雞比到你既，都算有誠意啦，d雞都幾滑，我都食左好多。


海鮮辣麵，一般般吧，幾樣海鮮都唔係幾新鮮，麵就似一般既辛辣麵咁煮，呢個唔係太值得食。


呢個係食左咁多個石煱最低分既一個，咩都冇，只係得雞肉係面，石煱係我最鐘意個樣，呢樣係我最易比高分，仲要係幾易整既，都咁差.....我真係好失望，呢間真係冇下次。

不過，我飽到呢．．．．

食物評分：★★★☆☆☆☆☆☆☆

是日消費：約100/位 (2位用)

臨記@天后

臨記
天后銀幕街15-17號輝漢大廈地下A2C舖

好耐冇去過天后了，又有ｄ掛住個邊ｄ糖水，等我下次食糖水當晚餐，介紹哂所有好食既糖水鋪先！
今次係經過呢間臨記既姐，記得上網都有好多好評，咁我就點佢最出名既格仔餅，睇下咩樣先啦！





呢間既格仔餅比正常個ｓｉｚｅ厚，格仔坑紋比一般深同大，但味道同正常既分別不大，感覺好似食緊舊版窩夫咁，如果有舊雪糕你話幾好呢，哈哈！
不過呢個係幾特別版既格仔餅，都可以試下既．．．．

食物評分：★★★★★☆☆☆☆☆

是日消費：$12/件

Le Salon De The & La Boutique @ 中環

Cafe - Le Salon De The & La Boutique @ 中環
中環德輔道中12-16號置地廣場315號舖，2166 9088

上網見到呢間中環區既cafe 一直係排名榜度屹立不倒，都想試一試中環區既名店，同埋想扮下有錢佬既生活呢？（講笑～）就專登去左個度high番個tea 先，但個時已經六點幾，已經冇人既地方了，就連蛋糕都係得番少少．．．．．



牛角包

呢度聽講好出名牛角包，點知，去到又係冇貨，得番幾個，之後仲話〔叮〕比我，我都面色一沉了，心諗：我特登黎，咩都冇得食，仲要叮比我，我個時有ｄ脾氣想走，壓一壓怒氣，就點多左兩樣野埋位坐了。

牛角包我抱住唔好食就算既心態，因為叮呢一個字。用刀一切之下．．．見到好脆，唔係丫麻，脆到外皮彈開左好多。之後咬一啖，外脆內軟，好鬆化，個酥皮真係做得好好～如果有多件，我都想點多幾件丫，完全唔同一般個ｄ！估唔到叮左都咁高級！


前：latte　　　　　　　　　
後：chocolate　　　　　　　

前：white chocolate passion fruit cake
後：opera cake

呢兩隻cake 都好 juicy丫，點形容呢，好似一舊海綿吸左ｄjuice 之後拎去整咁，passion cake 真係食到好濃既熱情果味，而另一件就好強烈既朱古力榛子，ｄ蛋糕真係高水準，所以呢個ｔｅａ真係幾正的！

食物評分：★★★★★★★★☆☆
是日消費：約85/位

蒲鍋@九龍城

蒲鍋日式燒肉火鍋專門店

九龍城賈炳達道128號九龍城廣場UG25-26號舖，23832822

今次又再一次黎到九龍城主場大戰燒肉店了。其實本人唔係住係九龍城嫁，但係有一次機緣巧合咁去九龍城食左一次泰國菜，就開始愛上左九龍城。點解九龍城ｄ野食咁吸引呢？其中一個原因可能因為大多食肆既關係，如果想分一杯羮，必需要有拿手小菜，並且各出奇謀，吸引最多人光顧。

今次幫襯呢一間，我上網已經睇過係麻麻地嫁喇，聲稱１５８有和牛，其實邊有可能有和牛丫，就算有都唔敢食啦！不過，我又想試下究竟得唔得啵．．

事先一提，愛靚既女仕，千祈就唔好著靚衫去，事關油煙非常之大，我一入去就已心知不妙，勁大陣油煙味囉，全場只滿了６成左右。一坐底，個待應已經好似背急口令咁講解一次點剔，仲話汽水任飲，野食任叫，心諗：任飲已經抵番啦！


刺身拼盤

一黎就刺身拼盤，由於本人好驚食生的三文魚，我放左入鍋燒左先食．．．
吞拿魚根本係冰箱拎出黎，好難食！！！！！我又係拎左去燒！


點左太多野了
．霜降牛肉　　　　．雞中翼　　　　．煙肉　　　　
．安格斯牛肉　　　．豬頸肉　　　　．煙鴨胸
．牛仔骨　　　　　．豚五花腩　　　．鴨舌
．牛脷　　　　　　．金沙骨　　　　．帆立貝
．特級羊架　　　　．牛仔腸　　　　．花枝片

帆立貝有４大粒丫，粒粒都好大粒，粒粒都大概係食指同大拇指既一個圓咁大，仲有２個五蚊咁厚，都幾誇張丫，心諗：食帆立貝都抵番哂丫，我話知你咩牛丫！

霜降牛肉，真係麻麻地，有少少韌，根本冇入口即溶既感覺，所以配唔上霜降！
牛脷都幾爽，不過可能火太猛，鎖唔到肉汁，又係麻麻地
花枝片就做得幾好，又爽又甜，都係推介之一。
羊架有騷味，麻麻地，如果食要加多ｄ配料整一整
鴨舌，燒野食真係未整過鴨舌，原來都幾得意，入口幾滑，幾正啵！
其他都係同一般冇分別。

基本上所有野都冇野調味，咩都要自己動手啵！



．雞肉串　　　　　．翠肉瓜
．豬頸肉串　　　　．茄子
．雞肶菇　　　　　．多春魚

原來燒雞肶菇同埋翠肉瓜都幾好食嫁啵，ｄ水份都會留係入面，外表燶燶地，入面都仲有水份，都幾ｏｋ嫁啵。
多春魚真係幾難燒，我試過多春魚光唔熟真係好難食嫁！所以今次熟左ｄ，但都係咁難食！


第二輪大戰！

．雞軟骨　　　．秋刀魚
．魷魚鬚　　　．鮮冬菇
．風鱔

追加左２樣未食過既，雞軟骨太飽冇食到。
魷魚鬚都幾新鮮，幾得嫁！加埋配料送酒一流丫！
秋刀魚呢，估唔到佢比咁大條我，心諗：一定食唔哂丫！麻麻地新鮮，但有誠意，我加你分！！！
風鱔，原來都幾彈牙，肉質幾似脆肉鯇，又係必點之一





總結：原來平野都有好野嫁啵！初初諗住，佢一定交行貨比我，樣樣都唔新鮮咪平囉！點知原來都唔係嫁啵，好多樣都有誠意，雖然牛肉麻麻地，但其他搭救，都算抵食丫！

不過，我番左屋企屙左三次，就算唔關呢間野既野，我都入你數丫！　因為小弟命仔緊要丫！
所以又減番你少少分。

總評分：★★★★★★☆☆☆☆

是日消費：$174/位

Domon@銅鑼灣

Domon 札幌拉麵
銅鑼灣波斯富街99號利舞臺廣場6樓A-B舖，28949699

今日落去銅鑼灣，又諗唔到食咩，就求求其其搵左一間之前入過黑名單既餐廳，再試多一次吧，我都會比次機會人地既，有改進就會去多一次丫。

其次就係我想講呢一個ｂｌｏｇ唔係咩飲食雜誌，唔會同人地賣廣告嫁，所以就算蔡瀾話幾好食都好，唔好食我一樣照ｂａｎｄ的。咁今次真係同佢間接較量緊個口味。

一入到去，個服務幾好，日文發音只有幾個唔準姐，哈哈。其實坐位都幾迫，講大聲ｄ都比其他人聽到。見到佢餐牌應該係叫我食牛油拉麵，咁我就試下佢囉，就點左２個ｓｅｔ，一個牛油拉麵+餃子（本人），一個泡菜拉麵+沙津，希望呢一餐比我加下你分啦。


牛油拉麵 (醬油湯底)
我都冇等人喇，一黎到就影完相文功課之後就開工，食拉麵前一定一定個習慣就係飲左一啖湯先，咦！暖咋啵，醬油未夠濃，雖然唔夠鹹，但都合格既，人人口味唔同丫麻。之後再試少少麵，我又咦左一下，點解有皂水味嫁！！！我以為食第一次錯覺姐，點知食多幾啖，ｄ皂水味仲勁，反而我試第二碗又冇事，真係失望到我丫，因為呢一點，我決定照入番佢做黑名單，話比人知，原來蔡瀾既推介係我角度係黑名單黎！



泡菜拉麵(味噌湯底)
其實呢一個拉麵配搭都幾奇怪，半韓半日咁，半桶水咁，應該都唔使試，泡菜一定唔好食既，所以我都費事評語，費事比人話：車！你都唔係點佢最掂個樣野，拉麵食泡菜咩？不過我又試過佢既拉麵，確實冇皂水之餘，湯底亦夠濃，所以應該係味噌比較好食ｄ。


蟹子沙津

煎餃子
幾熱，同幾脆，呢個好食過拉麵啦，如果要推介，推介左呢個先囉，哈哈！

總括黎講：呢一間由黑名單第八位，跌到二十位以內吧，大把進步空間

是日消費：$100/位

Jenny Bakery@銅鑼灣

Jenny Bakery
銅鑼灣糖街1-5號銅鑼灣中心1樓1047室，2577 3789

今日請左半天假去左上環睇牙，點知一陣就可以走得，咁就順理成章去左銅鑼灣買ｄ手信返公司食啦，就揀左 Jenny了。
第一次去，唔識路，哈哈，入左一個充滿賓賓既商場，一入到去，完全冇曲奇味，心知不妙喇。左搵右搵，原來係隔離個好新既ｉ　ｓｑｕａｒｅ　商場，仲要上一樓５１室，唔識路真係搵唔到丫！

４ｍｉｘ曲奇

牛油吱花。咖啡。方形牛油。燕麥提子曲奇。

其實呢間我一早已經試過嫁喇，一直都覺得佢麻麻地既原因，就因為佢只得鬆，做唔到曲奇應有既香味，所以我一直都係比較ｂｕｙ四重奏就係咁解。

一開盒，已經有一兩舊碎左，仲要唔知去左邊，勁大陣咖啡味，完全蓋過哂咁多隻味。試左一口牛油吱花，一咬已經變左粉，我會比較喜歡呢一隻，因為本人鐘意淡既牛油味，呢一隻可以比到個感覺我。再試方形牛油，比較濃少少，其實同之前個隻相差不遠，稍硬少少。咖啡我諗唔使講啦，一開已經聞到，好濃的咖啡，又係粉狀物體。最後的燕麥提子，係比教脆的一款，比較有咬口的一款。

總括，其實呢隻唔係咁抵食，因為咁細罐已經要６０蚊，我諗都係得４０塊左右。我都係鐘意四重奏丫，因為鐘意脆ｄ，又多款色，唔似得呢隻好似要冇牙先食咁。

是日消費：$60/罐

大戶屋@太古

大戶屋
鰂魚涌康山道2號吉之島百貨L009地下，2560 1991

點解會黎呢一度？其實我都係想搵個地方可以行下姐，咁太古有個商場，睇落都幾多野行丫，咁就去行下啦，點知，個日冇做功課，唔知有咩地方好食，就盲中中咁上左條賊船，哈哈！比呢間野既外表吸引左，門面好靚，以為好好食，點知，佢既質數比普通既日本餐廳仲差，真係估都估唔到丫．．．．


喬麥麵。

唔係想像中咁好食，只不過係將碗裝變左木版上之麻。冇特別冇驚喜。其實真係冇乜味，佢木盤夠大，但麵又唔多，好似ｄ人食剩咁，不如轉細ｄ個盤，或者個外觀會好ｄ。




炸雞排

佢聲稱係主打囉。見佢咁，叫左個試下囉。唔試由自可，一試就把幾火 ! 又硬，又乾，又冇味 ! 下面仲有飯。呆左 =.= 連主打都咁難食，其他試唔試都擺就 ！我完全唔明點解某飲食網既人話呢個好食，完全理解唔到！ｄ人味覺係唔係有少少問題呢？



滑蛋豬扒飯。

其實我覺得一間日式既餐廳，如果有呢個滑蛋豬扒，多數都整到好難食 ! 整到好食既話，個間一定係咩日式野食都係好好食既，所以呢個係一個指標。我到而家都未食到一個好食既滑蛋豬扒飯，要求好簡單，只要豬扒脆就ｏｋ，但偏偏間間都整到咁淋，有咩好食丫！！如果有朋友食到個好好食既，請記得介紹一下，幾多錢都冇所謂，我一定會去try下的 呢個。

算啦，豬扒又淋，蛋又水汪汪。一個大交叉 !

是日消費：約 $80/位

Crumbs@銅鑼灣

Crumbs
銅鑼灣景隆街8號中央樓地下1C號舖，2793 9393

呢間開左都有幾個月了，又係銅鑼灣既小食店，所以又冇乜點想試。今次特登去食左ｄ輕量級既晚餐，之後就拎住杯甜品影左陣相，就落左肚了。
個個收銀個個問我要咩味，我個腦一時空白，都唔知食咩好，佢推介個脆脆，話係自己焗既，咁就是是但但啦，睇個款佢係老闆娘，應該唔會太難食掛。同埋我見到好多鬆餅，下次一定要試下丫！！！


士多啤梨加脆脆

佢地既 yogurt好得意，似雪糕，又似富豪雪糕既質感，又凍，又有乳酪味，真係好特別，呢個我又幾ｂｕｙ佢！值得一提，佢既脆脆又幾得意，少少甜，似炸蛋白，幾得意既。呢個都令我幾滿足，食完飯可以黎多一杯　＝０＝

是日消費 : $28/杯

漢城美食@尖沙咀

漢城美食
尖沙咀金巴利街10號 ，2367 5025

我不嬲都有行開尖沙咀，並且可以講係熟路嫁喇，今日又出開尖沙咀行下街，順便就搵下有咩韓國野好食啦，點知，我原來未行過呢一條街，呢條街其實好近正常行既地方，但又點都唔會行入去囉，因為好黑的。

講起韓食，香港大部分既餐廳都係韓燒，好少數會係只係整韓食，呢一間就例外了。佢唔會有咩韓燒，咩任食咁，只會有韓國家庭小菜，入到去，就好似返左屋企咁既感覺。不過，坐位依然好少，一檯一定坐４人，想搵地方放下野都唔係太得。

今次叫左３樣野，因為我又係食左個下午茶先入黎，個肚都未適應，加上放既位置唔多，叫左３樣野已經唔夠放了。

炆牛肋骨

唔知點解，我真係好鬼鐘意食韓國個隻炆牛肋骨嫁，未試過既朋友一定要試下，佢地真係會將牛肋骨炆到好淋，基本上骨同肉分開左了。不過呢間既牛肋骨就有少少韌，不過問題不大既，浸係牛肋骨既湯都可以飲既，幾重蘿白味，加埋牛肋骨，確實幾正既。


韓式炒年糕

哈哈，呢碟係我見咁多既炒年糕之中，最細碟既一碟，不過都同個價錢成正比既。呢個味道冇咁濃，可能就番香港人既口味掛，我反而覺得濃ｄ辣味同埋鹹番少少仲好食，始終我想食係韓國野，唔係香港口味丫麻。

韓式炒粉絲

呢間野既前菜真係好麻麻地，得２小碟，其他最少都有８碟嫁麻，可能怕冇位放掛，哈哈。所以我就叫左碟加大版既前菜，呢個其實都ｏｋ既，不過唔係特別需要叫囉，下次都係試下個炸醬麵先！

是日消費 : $85/位

帝景軒@汀九

帝景軒@汀九
荃灣青山公路353號帝景酒店2樓 ，3716 2898

有一次，睇到報紙賣廣告，見到帝景酒店食自助餐，百幾蚊一個人，好似幾抵咁，先打電話問有咩食，佢話咩都有，咁我就去啦。上網睇到都幾ｏｋ，咁就去左試下，之後就ｂｏｏｋ左７點鐘入去啦。

７點入到去，拎野食個時，我習慣行一個圈，睇下ｄ野食先拎。點知，不妙！冇野揀嫁，先講生既野先，冇魚生，得ｄ百佳壽司，仲要好少。海鮮，冷盤得龍蝦仔，圍蝦，青口，真係得咁多。
熱盤又係得幾樣，冇樣似樣，可以評為垃圾級，影哂相，真係得幾款。甜品得幾款蛋糕，仲要同人搶咁，不過個芒果慕絲可以講係唯一一樣係合格之上。

拎野食個時有個小插曲，我拎元貝個時，勁多師奶阿嬋殺埋黎 [搶]，元貝又唔係好大隻，勁細囉，ｄ人一次就拎6-7隻，頂，前世未食過咩 ! 我明明見住個厨師放野食上去，行到埋去都一隻都拎唔到，明明香港人，就好似成班大陸人咁搶，冇d 儀態，失禮街坊！

最緊要既係，佢８：４５就清場，冇野再出，仲要開始洗野，仲衰過平時個ｄ午餐 buffet 丫！
一句講哂，比錢都唔入去！絕對冇下次 ！


呢張相唔好以為係龍蝦仔好食，其實係下面隻凍圍蝦仲好食過佢，隻龍蝦仔，又苦又冇味，得ｄ雪味～

燒羊架

好韌，少少騷味，麻麻地．．．

冇樣得，蟹〔梅〕嫁，食左一啖就丟左！

青口，牛仔骨

好一般既貨仔，都可以填飽少少個肚既。

見到我拎咁少就知好食極都有限啦，呢個又係好一般既

得個芒果慕絲合格，因為係我至愛，可惜只係食左兩舊。

是日消費 : 約$140/位

石磨坊@旺角

石磨坊
太子西洋菜南街208號地下，23989433

個朋友同我講左個笑話，話我個胃有幾格，甜品個格特別大。咁我又唔覺丫，係個人比較為食，食完飯之後成日都覺得唔夠咁姐，要有甜品潤下喉，所以次次都係分開兩間黎食，咁先正丫麻。

至於呢一間，我都聽過佢個大名好耐嫁喇，都係想試好耐。入去就問個待應，你地出名ｄ咩嫁？（我當然知啦）佢竟然答唔出，咁鬼失敗嫁！梗係芝麻糊啦，哈哈！


芝麻糊

我一向都對中式甜品麻麻地既興趣，不過佢呢個又做得幾好，好濃黑芝麻味，攪到我食完想食多一碗。

朱古力燉奶

我個朋友叫左呢樣，我已經叫左佢，唔好丫，呢度係食芝麻糊，咁佢都唔聽都冇辦法，係夠滑，但上面個ｄ朱古力粉係多餘囉，畫蛇添足！冇左仲滑好多，不過同義順比，都差少少。

是日消費：18/位

The Taiyaki Crispy Hot Sandwich@銅鑼灣

The Taiyaki Crispy Hot Sandwich
銅鑼灣勿地臣街83號，28826060

呢間魚仔餅，為食既我又點會唔知道呢？我諗佢都開左年幾了，一直都未試過，係因為我對街頭小食就冇特別喜好，通常落到去搵食野，又點會搵一間做晚餐嫁，所以一直都冇試過係因為冇機會姐。

溫馨提示：每日都有減價品，$8 一件，原價就 $15。

煙肉+蛋

外脆內軟，有ｄ似雞蛋仔個皮，入面就煙肉加蛋，鹹鹹地又幾得意既，個皮其實都有少少既甜味。我同事話甜味仲好食啵，下次再試埋先。

是日消費：$8/件