萬麗海景酒店@灣仔

萬麗海景酒店@灣仔
灣仔港灣道1號萬麗海景酒店閣樓，2584 6970

講起呢一間蒲飛，我都覺得幾得意。事關我去灣仔返工已經有年半，但一直都唔知呢度有間酒店叫萬麗，上網睇下港島有咩蒲飛係好食既，見到呢間又幾合心意，如果用匯豐卡仲有８５折添，咁梗係試下好唔好食丫！一睇地圖，點知原來就係會展隔離．．．

個日去到，其實之前都食左少少野，ｄ下午茶都未〔落隔〕，又要進行呢個大食比賽，真係辛苦左我個胃丫，哈哈！普遍黎講，呢度都算大，但唔算多野食，比起旺角既花月庭丫，呢間應該少四分一左右，不過，佢呢度既甜品又真係算多既，我不斷拎佢都有refill既～

以下既相，應該就係呢間餐廳既全部野食喇，我記得既名就會盡打嫁喇，唔好〔叉仁廚〕我丫！


魷魚壽司拼長腳蟹


我一見到長腳蟹就會去掃嫁喇，呢度既長腳蟹好食丫！多汁，海水味，正丫，又多肉，夠新鮮，我都拎左唔少丫！！！

壽司＜－（垃圾級）食左一件就放低左，飯又硬，魚又乾，點解會拎出黎嫁！！！


芝士焗龍蝦　（一人一隻）

都唔係幾明，點解呢ｄ龍蝦一人一隻，唔通一個人可以食到幾隻咩．．．咁鬼滯。佢呢隻龍蝦焗得太乾喇，雖然食落去係好熱，但冇哂水份，有微波爐番叮既感覺。




自家制沙津


哈哈！我都幾有美感嫁啵．．．．（自己讚自己，哈哈！）


長腳蟹拼三文魚


長腳蟹好味丫　！！！！


所有冷盤　

長腳蟹‧螺‧海蝦‧青口‧蠔‧龍蝦仔

本人個胃都頂住頂住，只有食長腳蟹咋！


咖哩唔知咩雞肉　拼　唔知咩蝦

雞肉仲ｏｋ，蝦可以再見！



左起，芒果布甸，紅酒柑桔o者喱，桑子士多啤梨布甸

中間，熱情果焦糖布甸


最掂係中間熱情果個個，因為佢中間係流心嫁，我真係未食過好似咁既款，焦糖既外皮，入面似燉蛋既感覺，中間流心熱情果汁，真係食左一個都唔夠丫！
後面個三個都係陪襯嫁，都係一般既布甸，個粒桑子好鬼難食丫，哈哈！



左：藍莓慕絲‧咖啡朱古力芝士餅
中：柑桔慕絲‧意大利芝士餅‧綠茶泡芙
右：桑子朱古力撻‧朱古力脆餅

其實我本人唔太鐘意食芝士餅，次次食都好怕滯個種感覺，但係我又唔係芝士餅都唔食個種人黎既，所以黎講，有好多芝士餅都提唔起我掃食既衝動。不過，呢一間酒店既芝士餅我比個讚佢先，最好食就係咖啡朱古力芝士餅，佢最上個粒朱古力，咖啡粒形狀加咖啡味，我一咬落去就比左個驚喜我，幾得意丫。一共四層，最上層脆的，下一層就係芝士餅，再下一層就係慕絲，最後就係脆餅底，總共幾個感覺，真係幾得意，好多驚喜。

第二個好食就係意大利芝士餅，勁濃芝士味，好似咬緊芝士咁．．．．
之後就依次序為：柑桔慕絲＞桑子朱古力撻＞藍莓慕絲＞朱古力脆餅＞綠茶泡芙

朱古力脆餅，好硬，有杏仁，花生之類
綠茶泡芙，好淋，一pat野咁，好難入口。


自家制沙津



自家叫人整既班戟

我見到吉士，當然唔同佢客氣啦！幾大都要吉士啦，但諗左一陣，都係配士多啤梨好Ｄ，估唔到佢都整得幾好味，熱辣辣咁，可能我鐘意吉士掛。

最後的一轉長腳蟹

最上，左起：田螺焗薯蓉‧燒羊扒‧煙鴨胸‧豬頸肉

中間，左起：牛脷串，焗班塊

最下，燴牛尾

熱盤就係咁多，但我都冇點食，純粹影下相，試左少少味，

羊扒都有少少騒味既，牛脷勁硬，除左牛尾可以合格，其他一律肥佬。

最上，順時針列名：芒果布甸，熱情果焦糖布甸，熱情果焦糖布甸，薰衣草慕絲，朱古力脆餅，朱古力梨子慕絲

薰衣草慕絲：個種味怪怪地，話冇味又唔係，又唔覺好濃，淡淡地既慕絲咁。

朱古力脆餅，比之前個朱古力脆餅好食好多，呢個起碼咬到先丫，朱古力都幾濃，脆脆地都幾好食。

朱古力梨子慕絲，桑子好難食！

ＨＤ
士多啤梨‧朱古力曲奇‧朱古力

估唔到都有六種味道比你任食啵。

麵包布甸‧意大利芝士餅

兩個都咁好食！

麵包布甸，麵屯面，入面似慕絲熱食的甜品，淋淋地幾正的

意大利芝士餅，中間灰色個層有酒的，同樣都係咁正！

總括黎講，我好飽......
食物評分：★★★★★★☆☆☆☆
是日消費：$300/位 (匯豐已折)