旺角登打士街56號家樂坊G03舖，2781 4978
講起甜品的話，我都有幾種幾鐘意食既甜品嫁，蛋糕類就有芒果慕絲，最好就有芒果漿流出黎就仲正丫。小蛋糕類就係心太軟丫，流心朱古力又係一絕丫，餅類就有拿破崙，個吉士加酥皮，食完都幾回味，諗起都想食多次丫。碗裝的就一定係芒果黑珍珠了，唔知點解，我次次入糖水舖都會不其然咁叫左，次次都比佢吸引左，唔通有特別魅力？中式都有幾樣丫，燉奶同埋芝麻糊，兩個要做得好正既話，功力都要好足嫁，唔係話做就做嫁！
至於雪糕，我好鐘意食一隻牌子嫁，每次經過都有60%機會買杯嫁，個間就係Da Dolce Gelato Italiano，呢間野唔係咁出名，但我就覺得佢做得好好丫，有機會影幾張相先，因為次次都係食完就算，我都冇計過食左幾多次了．．．
哈哈，點解講咁多開場白呢，今次因為要講一講呢一度既主題，雪糕窩夫了，不過好唔好食，我又賣下關子先，睇落去就知嫁喇。
拿破崙
嘩，呢個係我食咁多個拿破崙之中最難食既一個丫！！！今次真係要show 下我個口頭禪丫-> [垃圾] ! 呢件野完全被判死刑 !
死因一：太甜，甜到我有少少想嘔，好似食緊糖咁！
死因二：酥皮太淋，好似吸左雪櫃既倒汗水咁，冇鬆化既感覺！
死因三：唔知佢用咩酥皮，咁鬼難食既，冇興趣研究！
朱古力碎雪糕窩夫 （細）
由於窩夫係熱既關係，雪糕好快就溶丫，影左幾張相，就溶左10%了，切埋都溶左一半了。佢既雪糕無疑係幾滑既，但我又唔覺得呢間好食過我鐘意食個間綠公仔啵，但我食到有好微既紅酒味，窩夫就比雪糕出色既，佢又熱又少少脆，加左糖漿同cream，個配搭都幾得，隻糖漿有少少似熱香餅個隻，由於本人太怕個隻味道，食左少少就算了，但係我覺得窩夫可以再整靚ｄ既，加多ｄ配料仲好。
食物評分(拿破崙)：☆☆+☆☆☆☆☆☆☆☆☆☆ (垃圾級別)
食物評分(雪糕窩夫)：★★★★★☆☆☆☆☆
是日消費：$28 +28
沒有留言:
張貼留言