尖沙咀山林道22-28號瓊林閣No.1 8-9號舖，2302 1888
今日係小弟既生日，本來我都好期待今年牛一去邊食，仲諗住我介紹幾間正野，約班朋友等我請佢地去食餐飽既。可惜呢，近排屋企發生一ｄ事，令到我完全冇興致去慶祝我生日，亦都唔想去慶祝，打算求求其其食一餐飯就過左呢一個平平淡淡既日子。哈！其實到呢一間餐廳都係我話事的，因為我之前成日去觀塘個一間大盛食，就覺得只係一般日本菜，不過就平ｄ咁解，ｄ野食都好大路下，普普通通，唔算難食，我扣埋價錢都會比合格既。
個日返完工之後再返學，放左學之後就近近地搵左呢一間食，入到去都幾似觀塘個間，但就比觀塘個一間光猛，唔使摸黑食飯咁慘，整體都幾似日本式既香港快餐店。
蟹子沙律
沙律個律字我到而家都唔太清楚用呢個定〔津〕呢一個字。我講返野食先，呢度既蟹子真係好似唔使錢咁，一大堆咁落，真係強勁。好似呢一張相咁，佢呢個廿八蚊真係幾抵食丫，淨係食蟹子都可以回本了。
鰻魚壽司
好耐冇試過佢地既鰻魚了，又係長長的，加埋燒汁都係幾正，不過飯就不合格，硬實實的！！
什錦刺身（細）
由於食飯時間已經九點幾，我都唔係幾食得落野，就點左個刺身充撐一下場面啦，不過，佢ｄ刺身真係麻麻地，基本上我覺得最好食都係得甜蝦，最鮮最甜。吞拿魚就有根，赤貝同魷魚都麻麻地新鮮了，冇咩甜味。三文魚雖然肥美，但我少食既，哈哈！
牛油果炸蝦金龍卷
蟹子又係唔使錢的！！！！
蝦都幾彈牙，我最欣賞既地方。
芝士焗金菇
呢個都幾入味，不過就都幾怕金菇個一陣〔木味〕，所以都麻麻地。
食物評分：★★★★★☆☆☆☆☆
是日消費：約 $100/位(2位用)
沒有留言:
張貼留言